Yigirma yoshli futbolchi halok bo‘ldi

Gananing “Berekum Chelsi” klubi futbolchisi Dominik Frimpong 21 yoshga yetmay turib qurolli hujum natijasida vafot etdi, deb xabar berdi mamlakat futbol federatsiyasi matbuot xizmati.

“Berekum Chelsi” mehmonda “Samarteks” jamoasiga qarshi Gana chempionati uchrashuvida 0:1 hisobida mag‘lub bo‘lgan edi.

Ma’lum qilinishicha, 20 yoshli Frimpong jamoa o‘yindan qaytib kelayotganda qurolli talonchilik natijasida halok bo‘lgan.

Qayd etilishicha, Gana futbol federatsiyasi klub va tegishli organlar, jumladan mamlakat politsiyasi bilan doimiy aloqada bo‘lib turibdi, chunki hodisa bo‘yicha tergov davom etmoqda.

Shuningdek, federatsiya kelajakda bunday holatlarning oldini olish uchun ichki musobaqalarga safar qilayotgan klublar uchun xavfsizlik choralarini qayta ko‘rib chiqadi va kuchaytiradi.

Frimpong 20 yoshda edi. Joriy mavsumda hujumchi “Aduana Starz” va “Berekum Chelsi” jamoalari tarkibida 13 ta o‘yin o‘tkazib, 2 ta gol urgan.