Zamohshari Bekmurodov chempion, Qurbonboevada bronza!
Chexiyaning Praga shahrida o‘tkazilayotgan Evropa Ochiq kubogining birinchi kuni dzyudochilarimiz ikki bor shohsupaga ko‘tarilishdi.
Quvonarlisi, buxorolik yosh dzyudochimiz Zamohshari Bekmurodov "Prague European Open" chempioniga aylandi. Faoliyatida ilk bor -73 kg vazn toifasida kurashgan 20 yoshli polvonimiz tajribali raqiblarini engib, nufuzli musobaqa g‘olibi bo‘ldi. Bekmurodov final bellashuvida ukrainalik Said-Magomed Xalidovni bir daqiqada og‘ritish usuli bilan mag‘lubiyatga uchratdi.
Terma jamoamizga bugunning hisobidan ikkinchi medalni Irisxon Qurbonboeva keltirdi. +78 kg vazndagi vakilamiz bronza medali uchun kechgan bahsda polshalik Kinga Volchakni ippon bahosi evaziga taslim etdi.
O‘zbekiston terma jamoasi medallar jamg‘arish bo‘yicha 1 ta oltin va 1 ta bronza medali bilan 35 davlat orasida 3-o‘ringa ko‘tarilib oldi.
Bu haqda O‘zbekiston dzyudo federatsiyasi matbuot xizmati xabar bermoqda.
Fikrlar