Ҳамиджон Актамов Олмалиқдаги ғалабадан кейин:

“Қизилқум” клуби бугун сафарда Суперлиганинг 6-турида қолдирилган АГМКга қарши ўйинни ўз фойдасига ҳал қилди – 1:2.

Учрашувдан кейин “Қизилқум” бош мураббийи Ҳамиджон Актамов матбуот анжуманида журналистларнинг саволларига жавоб қайтарди.

- Жуда қизиқарли беллашув бўлди. Иккала жамоа ҳам беллашув охиригача ҳужумкор ўйин кўрсатди. Яхши ўйин кўрсатдик ва ғалаба қозондик. Бу билан мухлисларимизни табриклайман.

- Ғалаба нимани эвазига қўлга киритилди, деб ўйлайсиз?

- Бугун ютмасак бўлмасди. Бунгача кетма-кет дуранглар ўйнаб келдик. Ўтган турда ҳам ўз уйимизда дуранг қайд этдик. Лекин футболчиларимиз қийин вазиятдан чиқиб кетишди, ўзларида куч топдилар. Учрашувга йигитларни руҳий томондан ҳам тайёрлай олдик.

- Ўтган йилги “Қизилқум” билан бу йилги “Қизилқум”ни қандай фарқи бор? Бу мавсумдаги натижалари яхшироқ. Жамоада нимани ўзгартирдингиз?

- Ҳимояда ва ҳужумда ўзгаришлар бўлган. Ҳимоя чизиғи ўзини оқлаяптию, аммо ҳужумда бундай бўлмаётганди. Кўзланган мақсадга эришдик. Ғолиблар муҳокама қилинмайди.

- Беҳруз Саъдуллоев захирадан майдонга тушган бўлса-да, яна захирага олинди. Бунинг сабаби нима?

- Тактик ўзгариш.

- Чемпионатдаги танаффусдан кейин “Қизилқум” яхши ўйин кўрсатяпти. Бунинг сабаби нимада ва мана шу темпни мавсум охиригача сақлаб қола оладими?

- Шуни ушлаб қолишга ҳаракат қиламиз. Яна олдинги гапимга қайтаман, бир ой футбол ўйналмади. Фақат машғулот ўтказилди. Шу боис ҳамма спорт формасидан чиқиб кетди.

- Ойбек Қиличев жамоани тарк этдими? Ёзги танаффусда қандай ўзгаришлар бўлади?

- Ойбек Қиличев жамоа билан бирга. Соғлигида бироз муаммо бўлгани учун бугунги ўйинга чақирилмади, унга дам бердик. Ўзгаришларни кўрамиз ва олдинда ўйинларимиз бор. Танаффусда кўрамиз, ҳозир бирор нима дея олмайман.

- Ватцадзе, Кухианидзе ва Қиличев клубдан кетади деб эшитгандик, бу қанчалик рост?

- Ҳамма гапираверади, футбол шунақа гапхона бўлиб қолган. Ҳозирча улар биз билан. Биринчи даврадан кейин мураббий қоладими ёки футболчими, ҳали ҳеч нима аниқмас. Ҳозирча ҳамма жамоа билан бирга.

- Охирги иккита ўйинда 3-4-3 тактикасида ўйнадинглар ва бу ўзини оқлаяпти. Келаси учрашувларга шу тактикадан фойдаланасизми?

- Бу жамоанинг сири, сизга ҳамма нарсани айтиб юборолмайман, эртага яна ўйинимиз бор.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар