Ўзбек футболчилари бу лигани анча олдин забт этган. Шукуровгача Сербияда кимлар тўп тепган?
“Радник” клубига қўшилган Отабек Шукуров Сербия футболидаги биринчи ўзбекистонлик эмас. Мамлакатимиздан етишиб чиққан чарм тўп усталари серб футболига анча аввал кириб келган.
2013 йилда ўша пайтда 19 ёшда бўлган ҳужумчи Ҳусниддин Ғафуров Иваница шаҳрининг “Явор” клуби билан шартнома имзолаган ва шундан кейин Сербия чемпионатида тўрт мавсум ўтказган.
Ғафуров “Явор” ва Лучани шаҳрининг “Младост” клублари сафида Суперлига ҳамда Биринчи лигада жами 88 та учрашувда иштирок этган.
2016/2017 йилги мавсумда яна бир ўзбек футболчиси Мурод Ражабов “Нови-Пазар”да фаролият юритди. 2024 йилда эса ёш истеъдод Амирбек Саидов Уб шаҳрининг “Единство” клуби шарафини ҳимоя қилган.
Ярим ҳимоячи Абубакир Муйдинов 2025 йил февраль ойидан жорий йил ёзига қадар Крушевацнинг “Траял” клуби таркибида Биринчи лигада тўп сурди.
Энди бу рўйхатга Ўзбекистон миллий терма жамоаси сафида 2026 йилги жаҳон чемпионатида иштирок этган тажрибали ярим ҳимоячи Отабек Шукуров қўшилди.
Eurasia Football нашри маълумотига кўра, “Радник” марказий зонасини кучайтиришни анчадан бери кутаётган эди. Дастлаб, клуб мутасаддилари Тигран Аванесянни таркибга қўшишни режалаштирган.
Арманистон терма жамоасининг 24 ёшли футболчиси таянч зонада ҳаракат қила олади. Бироқ у якунда Самарқанднинг “Динамо” клубини танлади. Ўзбек клуби унга яхшироқ шартлар таклиф қилган.
Бу ерда қизиқарли вазият юзага келди. Аванесян Тошкентда туғилган ва Арманистон терма жамоасини танлашга якуний қарор қабул қилгунига қадар назарий жиҳатдан халқаро фаолиятини Ўзбекистон билан боғлаши мумкин эди.
Бошқача сценарийда у миллий терма жамоада Шукуровнинг рақобатчисига айланиши, ёшдаги фарқни ҳисобга олганда эса кейинчалик унинг позициясига асосий даъвогарлардан бири бўлиши ҳам мумкин эди.
Якунда эса Аванесяннинг ўзи Ўзбекистонга йўл олди, “Радник” эса арманистонлик ярим ҳимоячини қўлга кирита олмагач, бир неча ҳафтадан сўнг Шукуров билан шартнома имзолади.
"Навбаҳор"да ишлаган машҳур мураббий "Манчестер Сити" йўқ қилинишига қарши чиқди
ФИФА мундиалда Ўзбекистонга қарши ўйнаган терма жамоага ён босгани ошкор бўлди
Кореяга ютқазган Ўзбекистонга ФИФАдан сюрприз
Ўзбекистон ўйинида иккита тарихий рекорд ўрнатилди
Фикрлар