Рэшфорд ҳамма қочаётган жамоага бормоқчи

“Манчестер Юнайтед”га тегишли бўлган Маркус Рэшфорд жорий мавсумни ижара асосида “Барселона”да ўтказмоқда. Каталонияликлар англиялик юлдузни тўлиқ трансфер қилиш истагини билдирган, бироқ бу режани амалга ошириш учун каталонияликлар олдида айрим тўсиқлар бор.

BBC маълумотига кўра, Агар каталонияликлар Рэшфордни тўлиқ трансфер қилиш масаласини ҳал этолмаса ҳужумчи Англия Премьер-лигаси аутсайдерига айланиб қолган “Тоттенхэм”га кўчиб ўтиши мумкин.

Манба журналистларининг таъкидлашича, Лондон клуби раҳбарияти ҳужумчининг ҳар бир қадамини диққат билан кузатмоқда ва уни ҳужум чизиғини янгилаш учун асосий  вариант сифатида кўрмоқда. Трансфер фақат Лондон клуби Англия Премьер-лигасида жон сақлаб қолган тақдирдагина амалга оширилиши мумкин, чунки катта харидлар учун бу асосий шарт ҳисобланади. Айни пайтда жамоа жадвалда 18-ўринда бормоқда.

Эътиборлиси, апрель ойи охирида инсайдер Николо Скира X ижтимоий тармоғида Рэшфорд “Барселона” билан 2030 йилгача мўлжалланган тўлиқ шартнома бўйича келишувга эришганини хабар қилган эди.

Шунга қарамай, “Тоттенхэм” бу ҳолатдан тўхтаб қолмаяпти. Агар жамоа Чемпионшипга тушиб кетмаса, футболчи учун таклиф киритилади.

Бундан ташқари, айни пайтда “Тоттенхэм”нинг аксарият етакчи ўйинчилари жамоа қуйи лигага тушиб кетишидан хавотирда ва ўзлари янги иш жойи қидиришни бошлаб юборган.