Shota Arveladze shartnoma imzolash arafasida

Gruziyalik taniqli murabbiy Shota Arveladze 2020 yili “Paxtakor”ni tark etganidan beri hali biror-bir klubni qabul qilib olgani yo‘q. Holbuki, uning xizmatiga katta qiziqish bilan qarayotgan klublar bisyor.

O‘tgan yilning oxirgi oylarida esa Arveladzening Angliya chempionatida ish boshlashi mumkinligi borasida xabarlar tarqalgani yodingizda bo‘lsa kerak. Aniqrog‘i, unga chempionship ishtirokchisi “Xall Siti” klubiga bosh murabbiylik qilish bo‘yicha ish taklif qilingan.

Oxirgi ma’lumotlarga qaraganda, klub va murabbiy o‘rtasidagi muzokaralar juda ijobiy tarzda kechmoqda. Ayni paytda Tbilisida bo‘lib turgan Shota Yustinovichning bu masala yuzasidan Sports.uz muxbiriga ma’lum qilishicha, “Xall Siti” unga shartnoma taklif qilgan va hozirda uni imzolash arafasida ekanini qo‘shimcha qildi. Shuningdek, murabbiy Angliyada ishlash imkonini beruvchi viza yuborilishini kutayotganini ham aytib o‘tdi.

Ayni paytda “Xall Siti”ni irlandiyalik 42 yoshli Grant Makkan boshqarib turibdi. Bu klub 24 ta ishtirokchi orasida turnir jadvalida 23 ochko bilan 19-o‘rinda boryapti.