"Нефтчи" Вагиз Галиулинга қизиқяптими? Аброр Исмоилов Россияга кетадими? Бош мураббий Виталий Левченко қандай жавоб берди?

Сайтимиз орқали хабар бериб ўтганимиздек, “Нефтчи” клуби мавсумлар оралиғида тайёргарлик босқичи учун режаларни ишлаб чиққан ва унга кўра, жамоа Тошкентда ва Туркияда ўқув-машғулот йиғинларини ўтказади.

Таркибда ҳам янгиликлар бўлиши табиий. Шу боис бош мураббий Виталий Левченко билан суҳбатлашдик.

- Виталий Григорьевич, Туркияга бориб келибсиз-а?

- Ҳа, жамоа қишки йиғинларни ўтказадиган меҳмонхона ва машғулот майдонларини бориб кўриб келдим. Туркиядаги биринчи йиғин 6 январдан 20 январгача давом этади. Иккинчиси 27 январдан 17 февралгача. Тошкентдаги биринчи йиғинимиз эса 12 декабрдан 24 декабрга қадар олиб борилади.

- Клубга янги бош директор тайинланди. У билан янги мақсадлар ҳақида гаплашдингизми?

- Янги директор билан учрашув режалаштирилган. Унда барча масалаларни муҳокама қиламиз.

- Жаъфар Ирисметов “Нефтчи”да иш бошлаши кутилаётганди, лекин бу амалга ошмабди. Нима учун?

- Бу масалада тўлиқ маълумотга эга эмасман. Шу сабабли бу саволга жавоб беришга қийналаман.

- Нурилло Тўхтасиновдан ташқари яна қайси янги футболчилар билан келишувларга эришилди?

- Янги футболчилар билан музокаралар олиб бориляпти. Аммо мен янги ўйинчиларнинг номларини ҳозир айтишга тайёр эмасман.

- Эшитишимча, Вагиз Галиулинга қизиқиш бор экан, шу ростми?

- Рўйхатимизда кўплаб малакали футболчилар бор. Лекин ҳозирча шартнома имзоланмаган. Шу сабабли барча икир-чикирларини айта олмайман.

- Суперлиганинг жорий йилги мавсумдаги савияси қандай таассурот қолдирди?

- Ўзбекистон чемпионати етарли даражада юқори. Чемпионлик масаласи соврини охирги турда ҳал бўлди. Бу эса жамоаларнинг юқори ҳолатдаги рақобатбардош эканлигини англатади.

- Суперлига учун ишлаб чиқилган янги формат сизга ёқдими?

- Қоғоздаги янги формат юқори даражада эканлигини англатяпи. Яна ўйинлар қўшилади ва дастлабки олти ўрин учун рақобат анча ўсади. Иккинчи гуруҳда ҳам ўтиш ўйинларига тушиб қолмаслик учун кураш яхшигина кечади.

- Жамоани яна кимлар тарк этди?

- Шаҳзод Убайдуллаев борасидаги вазият ҳозирча номаълум.

- Шунингдек, Аброр Исмоиловга Россиянинг иккита клуби қизиқаётгани ҳақида эшитдик. Унинг масаласи нима бўляпти?

- Исмоилов борасидаги вазиятга яқин кунларда аниқлик киритилади, деб умид қиламан. Ўйлайманки, биз бир тўхтамга кела оламиз.

- Сизнингча, “Нефтчи”нинг “Мавсум-2022”даги яхши футболчиси ким бўлди?

- Биргина футболчини алоҳида ажратиб кўрсатиш тўғри эмас. Биз бир жамоа сифатида кучли кўриндик. Барча майдонда нима қилиши кераклигини яхши тушуниб турди.

- Сизнингча, бу йил ким жаҳон чемпиони бўлади?

- Бразилия терма жамоасини айтган бўлардим.

Шуҳратбек Жўраев.