Сречко Катанец: "Аргентина Мессисиз қандай бўлса, биз ҳам Шомуродовсиз шундаймиз"

Осиё кубоги 1-тури доирасида Ўзбекистон ва Сурия терма жамоалари ўзаро куч синашди ва унда томонлар 0:0 ҳисобида дуранг ўйнади. 

Мазкур баҳс якунига етгач, Ўзбекистон терма жамоаси бош мураббийи Сречко Катанец матбуот анжуманида ўз фикрлари билан ўртоқлашди. 

"Хайрли кеч. Очиғи, нафақат натижадан, балки ўйиндан ҳам қониқиш ҳосил қилмадим. Гол уриш йўлини топа олмадик. Аммо барибир йигитлар ҳаракат қилишганини айтишим керак. Сурия 90 дақиқа орқага тушиб, ўйин намойиш этди. Бундай рақибга қарши ўйин ҳар доим қийин кечади.

Элдор жамоамиз учун энг муҳим футболчи. У Ўзбекистондаги энг яхши ҳужумчи ва бундай ўйинчининг йўқлиги майдонда сезилиши табиий. Аргентина Мессисиз қандай бўлса, биз ҳам Элдорсиз шу аҳволга тушиб қоламиз.

Биз 5 ҳимоячи билан ўйнаганимиз йўқ, бундай схема нотўғри талқин қилиниш оқибатида юзага келган. Ҳозирги Ўзбекистон 3 ҳимоячи ва 2 лотерал билан ҳаракат қилади. Қанотдаги 2 футболчимиз эса вингерларга фаол тарзда кўмаклашиб туради.

Кейинги турда Ҳиндистон билан ўйнаймиз. Улар яхши жамоа, ҳурмат билан муносабатда бўлишимиз керак. Чунки мазкур мусобақада ҳамма бор кучини ишга солади. Олдинда икки учрашув кутиб турибди ва биз тезроқ ўзимизнинг энг юқори даражамизга чиқиб боришимиз зарур.

Жароҳатлар борлиги - ҳақиқат. Тўпурарсиз терма жамоа умуман бошқа жамоага айланиб қолади. Буни нафақат биз, балки бошқа кўплаб жамоалар мисолида ҳам кўриш мумкин.

Ушбу натижа бизнинг руҳий ҳолатимизга салбий таъсир кўрсатмайди. Олға интилишда давом этамиз ва мақсад сари тўхташ ҳаёлимизга ҳам келгани йўқ", - деди мутахассис.