Акмал Рустамов: "Мазкур беллашувда тактик тарафлама бир қатор ўзгаришлар қилдик"

Суперлиганинг 14-туридаги "Қизилқум" - "Нефтчи" (1:1) учрашувидан кейинги матбуот анжуманида навоийликлар устози Акмал Рустамов ўйин ҳақидаги фирклари билан ўртоқлашди. Бу борада клуб матбуот хизмати маълум қилди.

"Андижондаги оғир учрашувдан кейин "Нефтчи"га қарши тайёргарликни бошладик. "Нефтчи"ни Ўзбекистоннинг энг кучли, шаклланган жамоаларидан бири, деб ҳисоблайман. Шу боис мазкур беллашувга тактик тарафлама бир қатор ўзгаришлар қилдик. Бу каби баҳсларда биргина гол ўйин тақдирини ҳал қила олиши мумкин.

Меҳмонлар ўз имкониятларидан фойдалана олишди. Ўз навбатида биз ҳам ўйин охирида уларга жавоб қайтаришга улгурдик. Йигитларга раҳмат айтаман. Майдонда бор кучлари билан ҳаракат қилишди. Биринчи давранинг сўнгги учрашувини Ғузорда "Шўртан"га қарши ўтказамиз. Насиб этса, бу беллашувда мухлислар кутган натижани қайд этишга уриниб кўрамиз".