“Реал” Винисиус кетишидан қўрқмайди

COPE нашри журналисти Роберто Моралес Мадриднинг “Реал” клуби бразилиялик легионер Винисиус Жуниор билан ҳамон шартномани узайтирмаганига муносабат билдирди.

- Винисиус ўзини “Олтин тўп” соҳиби сифатида ҳис қилиб юрган пайтда “Реал” билан шартномани узайтириш ташаббуси айнан ундан чиққанига ишонган эдик. У клуб олдига қатор шартларни қўядиган даражада эди.

Энди вазият ўзгарди. Ўтган мавсум Винисиуснинг ўйинидаги пасайиш ортидан “Реал” бор эътиборини Килиан Мбаппега қаратишга мажбур қилмоқда. Ҳозир музокаралар вақтини, ҳамкорлик даврини ва қўйиладиган талабларни бошқариш имконияти “Реал” томонига ўтган.

Винисиуснинг кетиши бундан икки йил олдин бўлгани каби клуб учун қўрқинчли эмас. Ҳозирги вазиятда ҳужумчининг кетиши клуб учун омадсизлик ҳисобланмайди, - деди Роберто Моралес.

Винисиус Жуниорнинг амалдаги келишуви 2027 йилнинг ёзигача давом этади. “Қироллик клуби” бу битим муддатини 2030 йилгача узайтирмоқчи эди. Кейин пайтда бу борадаги музокаралар секинлашиб қолди.