Винисиусга Европанинг икки топ клубидан таклиф бор

"Реал Мадрид"нинг юлдуз футболчиси Винисиус Жуниорнинг клуб билан шартномасини узайтириш бўйича музокаралар секинлашиб қолди. Бу эса унинг келажаги ҳақидаги миш-мишларни янада кучайтирди.

"Fichajes" нашри маълум қилишича, бразилиялик ҳужумчи вазиятни шошма-шошарлик билан ҳал қилмоқчи эмас. У ўз келажаги устидан назоратни сақлаб қолишни истайди. Ҳозирда Винисиуснинг "Реал" билан амалдаги шартномаси 2027 йилнинг ёзигача мўлжалланган.

Манбага кўра, Винисиусга икки супер-клуб – ПСЖ ва "Манчестер Сити" жиддий қизиқиш билдирмоқда. Улар футболчига молиявий жиҳатдан жуда манфаатли таклифлар тайёрламоқда.

Эслатиб ўтамиз, Жуниор "Реал" сафида 322 та расмий ўйинда иштирок этиб, 106 гол урган ва 83 голли пас муаллифи бўлган.