Алонсо Винисиус ва Мбаппега қаттиқ талаб қўйди

“Реал”нинг янги бош мураббийи Хаби Алонсо жамоага ўз ўйин фалсафасини сингдиришга ҳаракат қилмоқда. Янги устоз айрим ўйинчилардан янги услубга тезроқ мослашишни талаб қиляпти.

Хусусан, жамоанинг тўпурар ҳужумчилари Винисиус Жуниор ва Килиан Мбаппе рақиб дарвозасига хавф солишдан ташқари, учрашувлар давомида ортга қайтиб, ҳимояга ёрдам бериши ва майдон бўйлаб прессингларда қатнашиши шарт экани айтилмоқда.

- Биз бутун жамоа бўлиб ҳимояланишимиз керак.11 нафар футболчининг барчаси ўйинга жалб қилиниши шарт. Рақиб бизнинг прессингимизни ҳис қилиши керак. Бу жараён ўзига Винисиус, Беллингем, Вальверде ва Мбаппе ҳам қамраб олади.

Ҳимоямиз тўлиқ ва пухта бўлиши керак, рақибга қанча кам очиқ жой қолдирсак, шунча яхши. Биз бунинг устида ишлаяпмиз. Винисиус Жуниор ҳам шунга ҳаракат қилмоқда, - деди Хаби Алонсо.

Испаниялик мутахассис яқинда Винисиус Жуниор жамоага рақибни прессинг қилишда етарли даражада ёрдам бермагани учун бразилиялик юлдузга танбеҳ берган эди.