Нико Уильямс нега “Барса”га ўтмай, “Атлетик”да 10 йил қолишга кўнганини айтди

Испаниянинг амалдаги чемпиони “Барселона” анчадан бери ўзи орзу қилган футболчи – “Атлетик” етакчиси Нико Уильямсни иккинчи уринишда ҳам қўлга кирита олмади.

Бу гал кўпчилик 22 ёшли қанот ҳужумчисининг Каталонияга кўчиб ўтишига ишонган эди. “Барселона” эса, Никони кутиб олишга тайёр турганди.

Аммо Нико Уильямс “Атлетик” билан ўн йиллик шартномага имзо чекди. Шу тариқа, барча харидор клубларнинг орзуси армонга айланди. Футболчининг ўзи бу қарорини қуйидагича изоҳлади.

- Қарор қабул қилишга тўғри келганда мен учун энг муҳими – қалбимга қулоқ тутишдир. Мен ҳозир ўзим истаган жойда, дўстларим билан биргаман. Бу менинг уйим. Олға, “Атлетик”, - деди Нико Уильямс.

Нико Уильямс клуб тарбияланувчиси ҳисобланади. У қадрдон жамоасида жами 194 учрашув ўтказиб, ўз ҳисобига 40 та гол ва 41 та ассист расмийлаштириб қўйган.

Бундан ташқари, Нико Испания терма жамоасида 28 та ўйинда рақиблар дарвозасини олти маротаба ишғол қилгани қайд этилган.