“Сити” Бернарду Силва ўрнига ўйинчи танлади

“Манчестер Сити” раҳбарияти жамоа сардори Бернарду Силва билан хайрлашишга тайёргарлик кўрмоқда. Хосеп Гвардиоланинг энг ёқтирган ўйинчиси 30 июнь куни эркин агентга айланади.

Клуб мутасаддилари 2017 йилдан бери жамоада ўйнаб келаётган 31 ёшли футболчига ҳали янги битим бергани йўқ. Спорт директори Уго Виана португалиялик юлдуз ўрнига “Ноттингем Форест” ярим ҳимоячиси Морган Гиббс-Уайтни сотиб олиш вариантини кўриб чиқмоқда.

“Шаҳарликлар” 26 ёшли англиялик футболчини олиш учун 70 миллион евро атрофида харажат қилишига тўғри келади.

Бу ҳақда Football Insider нашри хабарига кўра, Морган Гиббс-Уайтга “Астон Вилла” ҳам даъвогар экани хабар қилинган эди.

Жорий мавсумда Гиббс-Уайт барча мусобақаларда 35 та ўйин ўтказиб, 7 та гол ва 4 та голли узатма амалга оширган. Аввал у “Вулверхэмптон”, “Шеффилд” ва “Суонси” каби клубларда ўйнаган.

Transfermarkt портали экспертлари бир неча позицияда ўйнай оладиган маҳоратли ижрочининг бозор қийматини  65 миллион еврога баҳоламоқда.