“Paxtakor” boshqa klublarning etakchilarini olib, kuchsizlantirmoqdami? Davron Fayzievdan mulohaza (Video)

Bir necha kun avval “Paxtakor” klubi o‘z tarkibini kuchaytirish uchun selektsiya ishlarini olib borayotgani haqida xabarlar tarqaldi. Unda “sherlar” o‘zimizning klublarda faoliyat yuritayotgan mahalliy va legionerlarga e’tibor qaratmoqdaligi yozilgan. Jumladan, “Lokomotiv” va “Navbahor” vakillariga qiziqish bildirayotgani va ularni bu borada ogohlantirilganmish.

Shu o‘rinda savol tug‘iladi, tarkibi ayni paytda eng kuchli hisoblangan “Paxtakor” nega boshqa klublarimizning etakchilarini o‘z safiga qo‘shib olmoqchi? Bundan ko‘zlangan maqsad nima, boshqalarni yanada kuchsizlantirishmi yoki yaxshi o‘yinchilarni tekinga qo‘lga kiritish? Mana shu savollar bilan “SPORTS.uz haftasi” ko‘rsatuvining eksperti taniqli sharhlovchi Davron Fayzievga yuzlandik va u o‘z munosabatini bildirdi.

- Birinchidan, maqsad menimcha, raqiblarni kuchsizlantirish emas. Busiz ham “Paxtakor” maqsadiga erisha oladi. Shunachaki o‘rtacha saviyadagi legionerlar ish bermadi. Buni boshida yangi rahbariyat kelganida qo‘llab ko‘rildi. Lekin o‘xshamadi. To‘g‘ri, Bezerra yaxshi o‘ynadi, ammo hammasi ham emas.

“Paxtakor”ning bu ishini yomon holat deb o‘ylamayman. Moddiy jihatdan kuchli klublar bo‘lsin, o‘zimizning futbolchilarga imkoniyat bersin, mahalliy o‘yinchilar shunday jamoalarda to‘p tepish uchun intilsin. Bu ham bir biznes.

Chempionat saviyasi tushib ketmaydimi? Germaniya Bundesligasi va Ispaniya La Ligasi darajasi tushmayaptiku. Ularda ham grandlar boshqalardan futbolchi olib, chempionlikni qo‘lga kiritishyapti. Bizda ham huddi shu holat ro‘y beryapti. Nega? Chunki klubda mablag‘ bor. Klub infratuzilmani yaxshilab qo‘ydi. Pul evaziga hamma narsani muhayyo qilishmoqda. Futbol bu biznes. Ayniqsa, klublar uchun. Terma jamoa - mamlakat jamoasi. Lekin klublarda pul bo‘lishi kerak. shundagina ular kuchayadi.

“Paxtakor”ning bu ishi uchun unga qarshilik qilsak, professional darajaga chiqib borayotgan jamoani yo‘lini to‘smasdan qolganlar shu saviyaga intilishi kerak. Homiylar kerak klublarga. Shunda raqobatchilari taklif qilgan pulga ko‘nmasdan o‘zining o‘yinchisini saqlab qolish uchun harakat qilsa, to‘g‘ri bo‘ladi. Nima uchun bu olyapti? Chunki uning puli bor. Bu bilan “Paxtakor”ni ayblay olmaymiz. Buni cheklaydigan qonun yo‘q. Ular hammasini to‘g‘ri qilyapti. Gap narigi jamoalarda. Nega etakchisini sotadi? Nega sharoit qilib bermaydi? Nega ambitsiyalariga mos o‘yin ko‘rsatmaydi? degan savol qo‘yish kerak. “Paxtakor” boshqa klublar uchun javobgarlikni bo‘yniga olishi shart emas. Qolaversa, “Paxtakor”da faoliyat yuritsa, raqobat yuzaga keladi, terma jamoaga foydasi tegadi. Ya’ni bu erda “sherlar” noto‘g‘ri ish qilayotgani yo‘q. Boshqalar futbolchisini qo‘yib yuboryapti, to‘sqinlik qilmayapti yoki aksi bo‘lsa ham o‘yinchining o‘zi “Paxtakor”ga o‘ta olmagani uchun hafa bo‘lib qolmoqda. “Paxtakor” u klublarni o‘ylashi shart emas. Raqobatchilari kuchsizlanib qolishini ularga qizig‘i yo‘q. Bu gaplarim qo‘pol tuyular. Lekin o‘ylab qarasangiz puli bor jamoa o‘zi uchun to‘g‘ri ishni amalga oshirmoqdaligini ko‘rasiz.

Nazarimda, boshqalarning o‘zi kuchayishi lozim. Rahbarlar, hokimliklar va kim bo‘lishidan qat’iy nazar klubini kuchaytirishni o‘ylashi darkor va raqobat bo‘lsagina bas kelishi mumkin. “Bavariya”ga raqobatchi yo‘q. Shuning uchun ularga futbolchilarning oqimini to‘xtata olishmayapti. Ispaniyada “Real”, “Barselona” va “Atletiko” moddiy jihatdan ancha kuchliligi bois qolganlardan yaqqol ajralib qolgan. Yangi chiqqan eng zo‘r futbolchilar “Real” yoki “Barselona”da o‘ynashni orzu qiladi. Agar o‘sha futbolchini ketishiga to‘sqinlik qilingchi, hafa bo‘ladi va klubida avvalgidek o‘ynamay qo‘yadi. Futbolchi ham yaxshi sharoitda o‘ynashni xohlaydi.

Shunga biz ham puling bormi, xorijdan futbolchi ol deya olmaymiz. Bu o‘zining ishi. Huddi qo‘shningiz puli ko‘p bo‘la turib, malibu xarid qilsa, unga mersades ol demaymizku, – dedi Davron Fayziev.