Нури Шахин Шомуродов уни қандай ҳайратга солганини айтди

Туркия Суперлиганинг 14-турида Ўзбекистон миллий терма жамоаси икки етакчиси – Элдор Шомуродов ва Аббосбек Файзуллаев ўйнаётган “Истанбул Башакшеҳир” жамоаси сафар учрашувида “Касимпаша”ни 3:1 ҳисобида енгиб, муҳим ғалаба билан қайтди.

Ушбу баҳсда ҳар икки легионеримиз рақиблар дарвозасини ишғол қилди. Жарима нуқтасидан суперзарба билан ҳисобни очган Аббосбек Файзуллаев Истанбул клубидаги дастлабки голини нишонлади.

Учрашувга нуқта қўйган Элдор Шомуродов эса, мавсумдаги ўнинчи голини урди ва сермаҳсул статистикасини яна бир аниқ зарба билан бойитди. Туркия футболида икки ўзбек футболчисининг бир учрашувда биттадан гол урган ҳолат биринчи бор кузатилмоқда.

“Истанбул Башакшеҳир” бош мураббийи Нури Шахин Туркия оммавий ахборот воситалари вакиллари билан суҳбатда ўзбек футболчиларининг жамоа учун аҳамияти юқори эканини алоҳида таъкидлади.

- “Касимпаша” жамоасига қарши ўтказилган баҳснинг биринчи бўлимини ўзимиз истагандек ўтказдик. Рақибнинг ҳар қандай тактикасига қарши ўйнашга тайёргарлик кўрган эдик. Биз тактик ўзгаришлардан жуда яхши фойдалана олдик.

Ўйиннинг иккинчи ярми ҳақида бунақа дея олмайман. Бунақаси бизда бир неча бор кузатиляпти. Биз барқарорликка ўрганишимиз керак. Қачонки 90 дақиқа давомида барқарорликни ушлай олсак, биз қудратли жамоага айланамиз.

Бир ўйинчи кам бўлиб қолганимиздан кейин анча қийналдик. Мураккаб учрашувда уч очко олганимиздан жуда хурсандман. Бу биз учун жуда муҳим эди. “Трабзонспор” билан бўлган ва ҳафсаламизни пир қилган ўйиндан кейин бу ғалаба анча енгиллик берди. Биз тўғри йўналишда кетяпмиз ва ҳали узоқ йўлни босиб ўтишимиз керак.

Элдор Шомуродов юқори даражали ўйинчи бўлишига қарамай, жуда камтарин экани ажойиб. Унда умуман юлдузлик касали аломатлари йўқ. У айтганларимизни тўлиқ бажаришга ҳаракат қиляпти ва юқори даражадаги профессионал ўйинчилигини кўрсатди.  Жуда камтар йигит. Аллоҳ унинг хоҳишларини рўёбга чиқарсин.

Биз Аббосбек Файзуллаевнинг ҳам даражасини яхши биламиз. Шунинг учун ҳам у “Башакшеҳир”да ўйнаяпти. Бу футболчиларнинг биз учун қадри баланд. Улар исталган вазиятда учрашувда бурилиш ясашга қодир.

Аббосбек Файзуллаев кичик жароҳат билан ўйнади. Чемпионатдаги танаффусдан кейин у юқори спорт формасига чиқади.

Энди “Фенербаҳче”га қарши учрашувга пухта тайёргарлик кўришга ҳаракат қиламиз. Жамоам бунақа тўқнашувларни ёқтиради. Биз яхши ўйнашни истаймиз. Ўтган баҳсда қизил карточка олган германиялик Деви Зелькенинг ўрнини босиш учун таркибимизда Нуну да Кошта, Бертуг Ўзгур ва Элдор Шомуродов бор. Айниқса, биз ҳужум марказида жуда зўр ҳаракат қиляпмиз, - деди Нури Шахин.

Энди Файзуллаев ва Шомуродов дуэти 7 декабрга белгиланган “Фенербаҳче”га қарши ўтказиладиган учрашувда иштирок этишга тайёргарлик кўрмоқда. Ҳозиргача Туркия чемпионатида олий дивизионидаги 17 та рақиб жамоадан тўққизтасига гол урган Элдор Шомуродов бўлажак тўқнашувда Абдуқодир Ҳусановнинг собиқ жамоадоши Эдерсон қўриқлаётган “Фенербаҳче” дарвозасига ҳам йўл топа олишига умид қиламиз.

Ҳусанов жойига мўлжалланган футболчини икки рақиб “юлиб” кетмоқчи

Файзуллаев ва Шомуродов гол урди, аммо...

Япон футболчиси Қозоғистонни эмас, Ўзбекистонни танлади

Ҳусанов мухлисларига яхши янгилик бор!

Ҳусанов масаласида сабр қилинг!

Аламли мағлубиятдан кейин Ҳусановнинг ўйини қандай баҳоланди?