«Milan» Mino Rayolani mag‘lub etgan birinchi top klub! Bu qanday sodir bo‘lganini bilasizmi?

May oyi «Milan» uchun omadli keldi. Avvaliga turinda «Yuventus» taslim etildi. Yakunda, Bergamoning «Atalanta»si ustidan g‘alaba qozonildi. EChL yo‘llanmasiga qo‘shimchasi chempionatning kumush medallari ham «rossonerilar»ga nasib qildi. Bu yoqimli, lekin «Milan» yana bir frontdagi jangda g‘alaba qozondi.

Janluka Di Martsio ishonchli manbaga aylanib borayotganidan xabaringiz bor. Uning aytishicha, «Milan» allaqachon «Lill» kiperi - Mayk Menyan bilan shartnoma imzoladi. Bu transfer tez orada ommaga oshkor qilinadi. Bu nomni avval eshitmaganingiz aniq. Shu bois, ishni u bilan tanishtirishdan boshlaymiz.

U kim?

Mika «Lill» bilan Frantsiya chempionatida «to‘polon» qilganlar etakchisi. U RPLdagi barcha kiperlardan kamroq gol o‘tkazib yuborishni uddaladi. Vaholanki, Frantsiya chempionatida 8 o‘yin ko‘proq. Bu omil esa, ko‘pchilikning e’tiboridan chetda qolmoqda. Shuningdek, Maykda quruq o‘yinlar soni 21 ni tashkil etadi. Bu kuchli beshlikdagi eng yaxshi natijalardan biri degani.

Keling, u qay darajada iqtidorli ekanligini aniqlash maqsadida PSxG+ga murojaat etamiz. Boyagi ko‘rsatkich kutilayotgan gol va darvozadan o‘rin egallagan gollar o‘rtasidagi farqni ko‘rsatib beradi. "Fbref" nashri bergan ma’lumotlarga ko‘ra 4,8+! To‘g‘ri, bu fantastik ko‘rsatkich emas, lekin Italiya, Germaniya va Frantsiya chempionatlarida unga teng keladigani yo‘q. Hatto, Donnarummaning ko‘rsatkichi ham undan ancha pastroq.

Agar adolat yuzasidan aytsak, Jiji o‘z faoliyatidagi eng yomon mavsumni o‘tkazdi. Shaxsiy statistikasi shundan dalolat bermoqda. «Lill» posboni esa, aksincha. Soddaroq qilib aytganda, «Milan» Menyanni Donnarummaning yomon mavsumi darajasidagi ijrochi ekanligini biladi. Italiya termasi a’zosi esa, o‘z pikida (vaholanki, u endigina 21 yoshga to‘ldi) Menyandan ancha yaxshiroq natijalar qayd etgan. «Milan» katta tavakkalga qo‘l urmoqda. Bu tanlov yakunda jamoani mushkul vaziyatga solib qo‘yishi yoki yangi darajaga olib chiqishi mumkin. Bu sport. Shunday ekan, unda «yo ostidan, yo ustidan»ga ham murojaat etishga to‘g‘ri keladi.

Darvozabonlar rokirovkasi qanday naf beradi?

Aslida, Mayk Menyan nima uchun «Milan»ga kerak bo‘lib qoldi? Bunga ikkita javob bor. Birinchisi, uning uchun 15 million evro to‘lab berish kifoya. Ikkinchisi esa, Donnarummaning ochko‘z agentidan qutilish imkoniyati.

Yaqinda «Chelsi» ham Eduar Mendi bilan shu voqeani boshidan o‘tkazdi. Tavakkal o‘zini qay darajada oqlaganidan xabaringiz bor. Vaholanki, Eduar 29 yoshda Londonga ko‘chib o‘tdi. Menyan endi 25 ni qarshilagan. Transfer summasi ham arzonroq.

«Milan» har safar Donnarumma bilan yangi shartnoma imzolayotganida, katta muammolarga duch keladi. Yosh, italiyalik, «Milan» tarbiyalanuvchisi, iqtidorli, terma jamoada birinchi raqamli, doimo super formada... Bundan Mino Rayola uddaburonlik bilan foydalanadi. Har safar agent mijozi uchun «Milan»dan millionlarni undirar ekan, o‘z g‘aznasini ham boyitib boradi. Ish shu darajaga borib etdiki, hatto klub muxlislari Jijini yomon ko‘rib qoldi.

O‘tgan safargi to‘qnashuvda «Milan» g‘alaba qozongandek tuyuldi. 2017 yilda rahbariyat yiliga 6 million evro maosh ko‘rsatilgan 4 yillik bitim imzoladi. Buning uchun Donnarummaning akasi safga qo‘shib olindi.

Hozir jamoa tepasida boshqa odamlar. Muammoni ham o‘zgacharoq echishga urinib ko‘rishlari tayin. Kiperning shartnomasi yozda o‘z yakuniga etadi. Aslida, muzokaralar boshlanishi kerak, lekin ayyor Mino hammasini so‘nggi bir haftada amalga oshirmoqchi. Shu tariqa, vaqtni o‘z foydasiga ishlashini ta’minlaydi.

AS nashri bergan xabarlarga qaraganda, Rayola agar «Milan» EChLdan quruq qolsa, mijozi uchun boshqa jamoa izlashni boshlamoqchi bo‘lgan. Manbaning ma’lum qilishicha, bir necha oy ilgari klub darvozabonga ikki yillik shartnoma taklif qilgan. Yiliga 8 million evro maosh va agar EChL yo‘llanmasi qo‘lga kiritilmasa, 20 million badal puli. Bir qarashda super taklif, lekin janob Mino undan voz kechdi.

So‘nggi ma’lumotlarga ko‘ra , agent Jiji uchun yiliga toza 12 million evro maosh undirib bermoqchi. Bu soliqlar bilan qo‘shib hisoblaganda, jamoaga 20 millionga tushadi. Qo‘shimchasiga, 20 million badal puli. Rayola shartnomani 2 yilga tuzish orqali «Milan»ni burchakka qadab qo‘ymoqchi bo‘ldi, lekin jamoa egalari bunga rozi bo‘lmadi.

Bu orada Rayola «Barselona» va «Yuventus» klublariga o‘z mijozini taklif qilishga ulgurdi. Hatto PSJ bilan kichik muzokara ham o‘tkazdi. Aslida, hammasida uni ayblash noo‘rin. Axir, u mijozining ruxsatisiz hech kim bilan aloqaga chiqmasligi kundek ravshan.

Rayola doim ish bergan taktikasi bilan jangga kirdi, biroq raqib xiyla ishlatdi. Paolo Maldini yangi darvozabon tez kunda tibbiy ko‘rikdan o‘tish maqsadida Milanga uchib kelishini ma’lum qildi. Frantsiya chempioni, Mino Rayolaga jamoa to‘lab beradigan konpensatsiyasidan arzonga tushmoqda. To‘g‘ri, Janluiji «rossonerilar»ning yuragi, ammo jang qurbonlarsiz bo‘lmaydi. Hozircha, to‘qnashuvnng ilk daqiqalarida «Milan» Rayolaga kuchli zarba yo‘lladi. Xo‘sh, yakunda kim g‘olib chiqadi? Voqealar rivojini SPORTS.uz da kuzating!

Yahyoxo‘ja Ulug‘xo‘jaev