Оқ Уйдаги тарихий кечада "Капитан Америка" ғалаба қозонди

Бир неча кун олдин қарийб бир йилдан бери интиқлик билан кутилган турнир бўлиб ўтди. Еттита жангнинг олтитасида фаворит спортчилар ғалаба қозонган бўлса, биттасида имкониятлари паст саналган жангчи зафар қучди. Қолаверса, етти жангнинг еттиси ҳам муддатидан олдин якунига етди. Ушбу кард кутилганидек, “йил карди” номинациясига даъвогар бўлиб турибди.

Мазкур кечада турли хил ҳикоялар гувоҳи бўлдик. Иккинчи бор йиқилиб, такрор оёққа турган Диего Лопес, чемпионлик камари учун титул баҳсга яқинлашган Шон О’мэлли, йўлдан чиқаётганини эзиб, янчиб ўтаётган Жош Хокит, потенциал GOATни ухлатган Сирил Ган, Чендлер номли шиширилган балонни ёриб юборган Руффи ва ниҳоят чемпионликни қўлга киритган Жастин Гейджи ва ҳоказо…

Улардан батафсил эътиборимизни қаратадиганимиз кечанинг марказий учрашувидир. Ушбу жангда америкалик ғалаба қозонди. UFC да "Олмос" лақаби Дастин Порьега берилган эди, лекин Жастин ҳам "Diamond" бўлиб чиқди. Биламизки, у ММАдан аввал конда оддий ишчи бўлиб ишлаган, ҳозир эса мамлакатнинг қасри – Оқ Уйда “Капитан Америка”га айланяпти. 

Биринчи раундда қаҳрамонимиз актив бошлади, лекин раунд охирларига келиб Илия фаолликни оширди ва очколар борасида олдинга чиқиб олди. Иккинчи раундда эса Топурия яққол устунлик қилди ва Жастинни ҳар кўйга солди. Ҳам "страйкинг"да, ҳам грэпплингда уни финиш қилаёзганди. Биринчи раундда Гэтжи рақибининг кўз соҳасига зарба бериб қизартириб қўйганди, 3 раундда ана шу нуқтага кетма-кет зарбалар берди ва моматалоқ қилиб юборди. Бу сафар америкаликнинг фойдасига! Танаффусда Илиянинг бурчагидаги акаси докторни чақирди ва жангни тўхтатишини сўради, доктор текширганидан кейин уни маъқуллади, аммо укаси бунга изн бермади. Тўртинчи раундда эса Жастин яққол устунликка эришди. Топурия ҳам учта кўраётган рақибининг ўртадагисига зарбалар бериб идора қилиб турди. Орада Гэтжи Илиянинг биқинига тизза зарбасини бериб, қовурғасини синдираёзди, синдирган бўлиш эҳтимоли ҳам йўқ эмас. 

Тўртинчи раунд тугагач Топурия стулга ўтираман, деб ерга ўтириб олишига оз қолганди, бурчагидагилар стулга ўтказиб қўйишди. Бу ҳолатда жангга давом эта олмаслигини ҳис қилган Александр укасини тинглаб ўтирмай баҳсни тўхтатди. Боксда бундай ҳолатда рингга сочиқ ташланади.

Сўнги пайтлар мўжизаларга бой ўтяпти. Кимни яққол фаворит, десак ўша мағлуб бўляпти. Айниқса, P4P рейтингининг ТОП 4 ини Кавказ мамлакатлари вакиллари эгаллаб турган эди. Улар UFC да ҳукмронлик ўрнатиб олишганди. Бироқ дастлаб, Мераб, ортидан Хамзат, энди Топурия мағлубиятга учради. Навбат Исломгами, ёки бу "лаънат" унга келганда тўхтайдими?

Жастин эса 37 ёшида уддалаб бўлмас ишни бажарди. Бу ёшда енгил вазнда чемпион бўлиш жуда қийин. Агар америкалик фаолиятини шу нуқтада якунласа, ҳикояси чиройли якун топган бўларди, лекин нафси бунга йўл қўярмикин?! Камарни ҳимоя қилиш осон эмас, зеро қаршингда Арман Царукян каби рақиб турганда. 

Лекин яқин орада Арман камар учун жанг қилишга руҳсат ололмаса керак, боиси у Оқ Уйдаги турнирни суғурталаш ўрнига бориб RAF да курашди. Жазоси тугамаган бўлса, Топурия билан жанг қилиши мумкин. Бу ҳолатда Гэтжи Чарльз билан уришишига тўғри келса керак.

Азизбек ҒОЗИЙ тайёрлади