11 йил аввал Cкудетто қаҳрамонлари қаерда эди?

Бугунги «Интер»нинг кучли жамоа сифатида шаклланишида футболчиларнинг тутган ўрни беқиёс. Хўш, чемпионлик учун пойгада энг муҳим ролни ижро этган футболчилар 11 йил аввал қаерда эди? Бугун шу саволга жавоб излашга уриниб кўрамиз.

Самир Ханданович

2009/10 йилги мавсум Самир учун «Удинезе» сафидаги 4-бўлди. Рафаэль Романинг клубга таклиф этилишига қарамай, словениялик ўз ўрнини ҳеч кимга бериб қўйгани йўқ. Биринчи рақам бўлиши кутилган Рома 6 йил давомида атиги бир бор асосий таркибда майдонда тушди, холос. Самир 2009/10 йилги мавсумда 40 ўйинда майдонга тушди, ўз рекордини янгилади. У ижро этган 130 сейв клубни А Серияда жон сақлаб қолишига кўмак берди.

Милан Шкриньяр

12 ёшида «Жилина» ёшлар жамоасига қабул қилинган Милан 2 йил ўтиб, профессионал фубол жамоаси билан шартнома имзолади. Орадан яна 7 йил ўтгач, Словакия футболи тарихидаги энг қиммат трансфер эвазига «Интер»га йўл олди.

Стефан Де Врей

2009 йилнинг 17 июль санасида Стефан ўз фаолиятидаги илк профессионал шартномага имзо чекди. «Фейеноорд» клуби томонидан асосий жамоага жалб этилган ҳимоячи ўша йилнинг 24 сентябрь санасида дебют учрашувини ўтказган. Ушбу суратда у энди 18 ёшга кирган пайтлари акс этган. Шунга қарамай, Де Врей дебют мавсумида 21 ўйинда майдонга тушган.

Аллесандро Бастони

11 йил аввал Бастони эндигина 10 ёшни қарши олган болакай эди. «Аталанта» академиясида шуғулланар, келажакда Бергамо клуби аъзоси бўлиши тахмин қилинган эди. Болакай орзуларига эриша олмади. «Аталанта» сафида 7 бор майдонга тушгач, ижара асосида турли клубларга жўнатиб юборилди. Бастони 21 ёшга тўлганида, «Интер»нинг асосий қуролларидан бири бўлишини тахмин ҳам қилмаган бўлса, ажаб эмас.

Александер Коларов

Ушбу таркибдаги энг номдор вакил! 2009/10 йилги мавсумда Коларов аллақачон юлдуз мақомини олган, «Лацио» билан кубок ва суперкубогда зафар қучган ҳимоячи эди. Мавсум якунида у билан «Ювентус» алоқага чиқди, лекин «Сити» таклиф этган пуллар сербни қизиқтириб қўяди. Натижада, қаҳрамонимиз мўмай пул эвазига Англияга йўл олади. У «туманли альбион»да йўқолиб қолгани йўқ. Италияга бир нечта улкан совринлар билан қайтди.

Данило Дъамброзио

«Интер» Жозе Моуриньо билан ЕЧЛ учун кураш олиб бораётганда, Данило камтарин «Юве Стабио» сафида тўп сураётган эди. У ишончли ўйини сабабли «Торино»дан таклиф олади. Кўп ўтмай, «буқалар» сафидан Миланга кўчиб ўтади.

Маттео Дармиан

Миланда таваллуд топган Дармиан А Серия ғолиблиги учун жуда узоқ йўлни босиб ўтди. 11 йил муқаддам у «Милан» томонидан «Падова»га ижарага бериб юборилади. 2011 йилда «Торино» сафида бориб қўшилган ҳимоячи «буқалар»ни элитага қайтаради. Уёғига нималар бўлганини яхши биласиз.

Марцело Брозович

2009/10 йилда ярим ҳимоячи Хорватиянинг иккинчи лигасида 8 ўйинда иштирок этади. Шунингдек, Хорватия (У 18) да дебют қилади. Якунда, унинг клуби биринчи лигага чиқади. Марцело эса, тез орада гранд клублар назарга тушади.

Никола Барелла

«Кальяри» академияси тарбияланувчиси! Орадан 5 йил ўтгач А Серияда дебют ўйинини ўтказган.

Стефано Сенси

«Римини» клуби ёшлар жамоаси аъзоси саналган Сенси жуда мураккаб аҳволга тушиб қолади. Жамоа банкрот бўлгач, ёш футболчи «Чезена»га йўл олади. Орадан 6 йил ўтгачгина Италия чемпионатида дебют ўйинини ўтказади. Унга қадар, турли муаммоларни енгиб ўтишга тўғри келган.

Матиас Весино

«Централ Эспаньол» аъзоси 2010 йилнинг март ойида асосий жамоага ўтказилди. 18 ёшида клуб ишончига кирган йигит 2 йилдан сўнг мамлакат биринчилигини қўлга киритади.

Артуро Видаль

2010 йил якунида Видаль «Байер» билан шартномани узайтиришдан бош тортади. 34 турнинг 31 учрашувида майдонга чиқиб келган чилилик 3 ўйинни қизил карточкалар учун ўтказиб юборади. Эътиборлиси шундаки, ўша мавсум Артуро 7 тур давомида қаторасига сариқ карточка билан сийланган. Айнан ўша мавсумда илк бор терма жамоадан чақирув олади.

Ашраф Ҳакими

«Реал» ёшлар жамоаси аъзоси! Профессионал футболдаги дебютини орадан 9 йил ўтибгина амалга оширади.

Эшли Янг

11 йил аввал Янг ўз фаолиятидаги энг ёрқин мавсумни ўтказган эди. «Астон Вилла» сафида 9+17 натижа! Афсуски, Англия лига кубоги финалида бирмингемликлар Янгнинг бўлажак жамоаси («Манчестер Юнайтед»)га имкониятни бой бериб қўяди. Мавсум сўнгида Янг илк бор Англия терма жамоасидан чақирув олади.

Кристиан Эриксен

Бу пайтда Голландиянинг «Айкс» клубида Кристиан Эриксен ўзининг дебютига тайёргарлик кўраётган эди. Март ойида у Амстердам клуби сафидаги илк голини уради. Тўғри, кубок баҳси, аммо ўша йилнинг ўзидаёқ УЭФА кубогида тўп суради. «Ювентус» билан баҳсни асосий таркибда бошлайди. Йил якунида, уни Голландиядаги энг яхши ёш футболчи деб эътироф этишади. Дания терма жамоаси эса, дарров уни ўртоқлик ўйини учун қайдномасига киритади.

Иван Перишич

2009 йилнинг ёзида Берлиннинг «Герта» клуби кўригида эди. Келишув амалга ошмагач, қаҳрамонимиз Бельгиянинг «Брюгге»си билан шартнома имзолайди. «Сошо»дан келган йигитча тезда чемпионат мухлислари эътирофига тушади. Мавсум сўнггида унинг ҳисобида 13+13 қайд этди! Келаси йили Иван ўзининг 22 голи билан тўпурар ва МВП талқинига кўра, мавсумнинг энг яхши футболчи деб эълон қилинган.

Ромелу Лукаку

16 ёшли ҳужумчи ўз жисмоний имкониятлари билан бутун дунёни ҳайратда қолдирган пайтлар... «Андерлехт» сафида 25 дақиқа тўп суриш орқали у машҳурликка эришган. Дебют мавсумидаёқ 15 гол урган Лукаку 2010 йилда Бельгия терма жамоасида дебют ўйинини ўтказди.

Лаутаро Мартинес

Бу пайтга 12 ёшли Лаутаро баскетболчи бўлиш учун саватча олдида шуғулланаётган эди. Якунда, футболга бўлган қизиқиш ғолиб чиқади.

Алексис Санчес

2009/10 йилги мавсумни Санчес Самир Ханданович билан биргаликда «Удинезе» сафида ўтказди. 32 турда чилилик ҳужумчи 5 гол урди, холос. Шунга қарамай, бу голлар «Ювентус», «Рома» сингари грандлар дарвозасидан ўрин эгаллаган. Ҳужумчи ҳисобида шунингдек 5 ассист ҳам мавжуд. Йил якунида уни Чили терма жамоаси ЖАРдаги ЖЧга олиб кетди.