15 дақиқа ўйнаган Умаров, захирадан майдонга тушган Файзуллаев ва дубль қилган Шомуродов ёхуд легионерларимиз учун якунига етган ҳафта қандай ўтди?

Якунига етган ҳафтада легионерларимизнинг жамоалари ўз ўйинларини ўтказишди. Кимдир дублни расмийлаштирган бўлса, кимдир захирадан майдонга тушди. Хурсанд қиладиган томони кўплаб вакилларимиз тобора асосий таркиб футболчисига айланиб бормоқда. Қуйида шулар ҳақида гаплашамиз. 

Ҳожимат Эркинов ("Ал-Ваҳда" - "Ал-Васл)

"Ал-Ваҳда" БАА кубок ярим финалида "Ал-Васл"га қарши ўйнаб, йирик 4:0 ҳисобида зафар қучди. Шунингдек, жамоа финалда "Ал-Айн" билан тўқнаш келадиган бўлди. Эркиновнинг ҳаракатларига тўхталадиган бўлсак, вингер учрашувни асосий таркибда бошлаб, 77-дақиқада захирага олинди. Футболчи 22 марта шерикларига пас берган бўлса, 19 таси аниқ борди. Икк марта муваффақиятли дриблинг ва 6 та дуэлда ғалаба қозониб, майдонни тарк этди ва "SofaScore" томонидан 6,8 балл олди. Олдинда "Ал-Ваҳда"ни "Ҳатта"га қарши баҳс кутиб турибди. 

Аббосбек Файзуллаев ("Крилья Советов" - ЦСКА)

"Оренбург"га қарши ўйинда бошланғич таркибдан жой олган Файзуллаев бу сафар захирада қолдирилди. Мураббий эса уни 77-дақиқада майдонга туширишга қарор қилди. 13 дақиқа ичида ярим ҳимоячи 1 мартагина пас бериб, 1 та дуэлда ютиб чиқди. Шунингдек, бир марта подкат ҳам ишлатди. Клубнинг кейинги ўйини Россия кубок чорак финалидан ўрин олган "Ростов"га қарши бўлиб ўтади. Мазкур беллашув 12 март куни Тошкент вақти билан соат 22:15да бошланади. 

Ҳусниддин Алиқулов ("Галатасарой" - "Ризеспор")

Узоқ танаффусдан кейин Алиқулов яна "Ризеспор"нинг бошланғич таркибига киритилди. Қийин ўтиши кутилган баҳсда ҳамюртимиз тўлиқ 90 дақиқада ҳаракатланиб, паслари аниқлиги 88 фоизга тенг бўлди. Битта подкат ва битта блок қўйиш орқали жамоасини бир марта муқаррар голдан қутқариб қолди. Аммо якунда барибир мезбонлар йирик 6:2 ҳисобида зафар қучиб, пешқадамликни мустаҳкамлаб қўйди. "Ризеспор" турнир жадвалида 7-ўринда бормоқда. Клуб 30-турда "Газиантеп"га қарши ўйнайди. 

Отабек Шукуров ("Кайсериспор" - "Ҳатайспор)

Кайсериликлар бу турда дуранг ўйнаб, бир очко олишди. Шукуров эса 76-дақиқада захирадан ўйинга қўшилиб, 1 та муваффақиятли дриблинг ишлатиб, 3 марта аниқ пас берди. Бу ярим ҳимоячининг кетма-кет 4-марта захирада қолдирилиши ва ушбу ҳолатнинг сабабини қуйида ўқишингиз мумкин. "Кайсериспор" 13-поғонада. Йилмаз шогирдларини олдинда "Аланьяспор" билан бўлиб ўтадиган баҳс кутиб турибди. 

Азизбек Турғунбоев ("Сивасспор" - "Аланьяспор")

Ҳужумкор ярим ҳимоячи бу сафар камроқ майдонда ҳаракатланди. У учрашув давомида 16 та аниқ пас, битта зарба ва 3 марта иккинчи қават дуэлида ютиб, 65-дақиқада захирага олинди. Жамоанинг эса мағлубиятсиз серияси тугади. Меҳмонларга таслим бўлган "Сивасспор" турнир жадвалида 9-ўринга тушиб кетди. 

Рустам Ашурматов ва Умарали Раҳмоналиев ("Рубин" - "Нижний Новгород")

Битта тур олдин жамоасининг муҳим голида қатнашган Ашурматов тобора асосий таркиб ҳимочисига айланиб бормоқда. Бу сафар Рустам дарвозани ишғол қилмаган бўлсада, майдондаги энг яхши футболчилардан бири бўлди. Унинг паслари аниқлиги 81 фоизга тенг эди. Шунингдек, битта ақлли пас ҳам берди. 7 марта лонг-болл амалга ошириб, деярли барча дуэлларда ғолиб чиқди. Шунингдек, рақибларига нисбатан 2 та подкат ҳам ишлатди. Ашурматовнинг бу ўйини 7,5 баллга лойиқ кўрилди. Раҳмоналиев бўлса захирадан тушиб, 16 дақиқа ҳаракатланди. Ярим ҳимоячи шерикларига 12 марта аниқ пас бериб, битта кросс амалга оширди ва 6,7 балл тўплади.

Жаҳбоз Умаров ва Жасур Яхшибоев ("Атирау" - "Ордабаси")

Иккала легионеримиз ҳам ўйинни асосий таркибда бошлаб, захирага олинди. Умаров учрашувнинг 15-дақиқасида жароҳат сабаб алмаштирилди. Яхшибоев эса 83 дақиқада майдонда ҳаракат қилиб, битта ҳам аниқ зарба бера олгани йўқ. Паслари аниқлиги бўлса 71 фоизни ташкил қилди. Шу билан бирга, 6,8 балл олди. Мазкур баҳсдан кейин "Ордабаси" 3-поғонадан жой олди. 

Иброҳимҳалил Йўлдошев ("Қайрат" - "Туран")

Йўлдошев тўлиқ 90 дақиқада ўйнаган бўлса, унинг жамоаси дуранг натижа қайд этди. Ҳимояда ҳам, ҳужумда ҳам фаол бўлган футболчи 7,5 балл тўплаб, битта сариқ карточка ҳам олди. "Қайрат" эса турнир жадвалининг 3-ўринига жойлашди. 

Остон Ўрунов ("Персеполис" - "Фулад")

Ўрунов яна асосий таркибда ўйинни бошлади ва ўзининг дебют голини уришга муваффақ бўлди. Шунингдек, вингер ажойиб ҳаракатлари билан аллақачон клуб мухлисларининг меҳрини қозониб бўлди. Олдинда бизни "Персеполис" ва "Истиқлол" учрашуви кутмоқда. 

Жалолиддин Машарипов ва Достон Турсунов ("Истиқлол" - "Истиқлол Кузестон")

Иккита ҳамюртимиз тўқнашган баҳсда мезбонлар минимал ҳисобда зафар қучди. Ушбу голга эса Машарипов ассистент бўлиб, 83-дақиқада захирага олинди. Турсунов тўлиқ ҳаракатланиб, битта сариқ карточкага лойиқ кўрилди. Турир жадвалида "Истиқлол" 42 очко билан биринчи, 39 очко жамғарган "Персеполис" эса иккинчи поғонада кетмоқда. 

Шерзод Темиров ("Китчи" - "Гонгконг ФК")

Темировнинг жамоаси Гонгконг кубоги чорак финалидан ишончли тарзда ўтиб, ярим финалга йўл олди. Мазкур беллашувда ҳужумчи битта гол уришга муваффақ бўлиб, битта сариқ карточкани ҳам қўлга киритди. Эслатиб ўтамиз, Шерзод клуби таркибида майдонга тушган ҳали ҳеч қайси учрашувни голсиз тарк этгани йўқ. 

Абдуқодир Ҳусанов ("Ланс" - "Брест")

Факундо Мединанинг сариқ карточкалари кўпайиб кетганлиги сабабли Ҳусанов бу учрашувни чап қанот ҳимоячи сифатида бошлади. 90 дақиқа ўйнаган фулбекнинг паслари аниқлиги 89 фоизга тенг бўлди. 3 та подкат ва 2 марта рақибини тўхтата олган Абдуқодирнинг ҳаракатлари 7,4 баллга лойиқ кўрилди. Шу билан бирга, футболчи ўз ҳисобига битта сариқ карточка ҳам ёздириб қўйди. 

Элдор Шомуродов ("Кальяри" - "Салернитана")

Жароҳатдан қайтган Шомуродов "Салернитана"ни аяб ўтиргани йўқ. 45-дақиқада захирадан майдонга тушган ҳужумчи Очоа дарвозасини икки бора ишғол қилди. Бу футболчининг "Кальяри" сафидаги дебют голи эди. Учрашувдан кейин Раньери у ҳақида нималар деганини қуйида ўқишингиз мумкин. Терма жамоамиз сардори мазкур ўйини орқали 8,5 балл тўплади. Сардинияликлар турнир жадвалида 14-поғонага чиқиб олди. Кейинги турда жамоа "Монца" билан ўйнайди.