18 та клубда ўйнаган Владимир Шишелов ёдингиздами? Ҳозир нима иш билан шуғулланаётганини биласизми?

Ўз вақтида миллий терма жамоамиз таркибида Владимир Шишелов тўп сурарди, ёдингизга тушдими? Унинг ўзига яраша мухлислари бор эди. Футболчилик фаолияти давомида кўплаб клубларда тўп сургани билан ҳам ном қозонганди. Шунинг учун Шишеловнинг фаолиятини саргузаштларга бой, деб аташ ҳам мумкин.

Ўйнаган клубларида у албатта ҳужумчи сифатида ўз вазифасини бажариш йўлида тўпурарлик салоҳиятини ҳам кўрсатган. Лекин Шишелов бутсаларини михга илганидан кейин гўёки бедарак “йўқолгандек” туюлди. Чунки уни қаерда ва нима қилаётгани борасида бирор маълумот кам эди. Фақат уни Россияда эканини билардик.

Бу йил 42 ёшни қарши оладиган собиқ футболчини излаб топдик. Натижада у sports.uz мухбирининг бир қатор саволларига жавоб қайтарди.

- Владимир Александрович, охирги йилларда сиз ҳақингиздаги хабарларни деярли эшитмай қўйгандик. Шу боис сизни футболдан узоқлашди, деб ўйлаганлар ҳам талайгина. Аслида ҳозир қаердасиз ва қандай ишлар билан машғулсиз?

- Футболдан кетганим йўқ. 2014 йилнинг ноябрь ойида “Олимпия қишлоғи-80” спорт мажмуасида футбол академиясини очдим. Академияда мен раҳбар ва бош мураббий бўлганман. Беш йил ичида бу академияда 5 ёшдан 17 ёшгача бўлган 500 нафар бола футбол ўрганди. 2016 йили бизнинг жамоа Москва шаҳри биринчилигида (учинчи лига) иштирок этганди. Унда 10-16 ёшгача бўлган болалар тўп сурган. 2018 йили “ОД-80” дея номланган катта ёшдаги ўйинчилардан иборат ҳаваскорлар футбол лигасида иштирок этадиган жамоани тузгандик. Бахтга қарши 2019 йили спорт мажмуасининг раҳбари бу лойиҳани ёпди. Ўша йилнинг августида ўз хоҳишимга кўра, ишдан бўшаш ҳақида ариза ёздим. Ўша 2019 йилнинг 8 ноябрида Куркино футбол академиясини очдим. Айни пайтда академияда 100 га яқин болакай бор.

- Фаолиятингиз давомида Россия, Ўзбекистон, Молдова, Хитой каби чемпионатларда тўп сурдингиз. Сиз учун эслашга арзигулик фаолият сифатида қайси клубдаги иштирокингизни айта оласиз?

-  Футболчилик фаолиятим давомида жами 18 та клубда ўйнадим. Уларнинг орасидан қайсинисидир ажратиб кўрсатмоқчи эмасман!

- Умуман олганда, фаолиятим ўзим кутган даражада яхши чиққан, деб айта оласизми?

- Бўлмасам-чи!!! Ўйинчилик чоғимда турли мамлакатларда бўлдим. Турли чемпионатларда тўп сурдим. Шундай экан, футболчилик фаолиятим жуда яхши чиққан, деб бемалол айта оламан.

- Нега ўзингизни катта мураббийликда синаб кўрмадингиз?

- Ўзимни бу ролда болалар ва катталар мураббийи сифатида синаб кўрганман. Бу жуда ҳам қизиқарли иш. Ҳозиргача шу иш билан шуғулланяпман.

- Ўзига яраша тажрибангиз билан ўзбек футболига ёрдам беришингиз мумкинми ёки фақат Россияда ишламоқчимисиз?

- Хизматимга кўз тикадиган жойда жон, деб ишлаган бўлардим. Бир қанча таклифлар бўлди. Аммо ҳаммаси шунчаки гаплардан нарига ўтмади. Айни пайтда Куркино футбол академиясида катта ёшдаги ўйинчилардан иборат ҳаваскорлар футбол жамоасини тузмоқчиман. Ўша жамоа кейинчалик профессионал даражага етадими ёки етмайдими, буни вақт кўрсатади. Эҳтимол, Ўзбекистонга қайтарман ёки Россиянинг ўзида қолиб ишларман. Буни ҳам вақт кўрсатади.

- Агар кузатаётган бўлсангиз, бугунги ўзбек футболига қандай баҳо берасиз?

- Албатта, кузатиб бораман! Айниқса, ўзим тўп сурган клубларни. Мен ўйнаган жамоаларнинг стадионлари қойилмақом даражада бўлган! Жумладан, “Насаф”ники. Унда ташкилий ишлар даражаси ҳам юқори эди. 2011 йили бу клуб ОФК кубогини ютди. 2018 йили эса, 23 ёшгача бўлган футболчилардан иборат терма жамоамиз Осиёда ғолиб бўлди. Умид қиламанки, яқин орада Ўзбекистоннинг бирор-бир клуби Осиё Чемпионлар лигасида ғолиб чиқади, миллий терма эса жаҳон чемпионати ва Осиё биринчилигида албатта ўзини кўрсатади.

- Терма жамоамизни ҳам кузатиб келяпсизми? Жаҳон чемпионатига ҳалигача чиқа олганимиз йўқ. Бу иш қачон содир бўлиши мумкин деб ўйлайсиз?

- Бизнинг терма жамоага доим нимадир етмай қолади. Умид қиламанки, Қатардаги жаҳон чемпионатида Ўзбекистон ҳам иштирок этади.

- Тўғриси, охирги клубингиз қайсилиги борасида саволлар бор. Қаерда тугатдингиз ва бутсаларингизни михга илишга нима сабаб бўлган?

- Мен тўп сурган охирги профессионал клуб - бу “Қизилқум”дир. 2014 йили жамоа билан фақат чемпионатнинг биринчи даврасида ўйнадим ва оилавий шароитга кўра, уйимга қайтишга мажбур бўлдим. Бундан афсусланаман.

- Футболдаги яқин дўстингиз ва ҳамкорингиз деб кимни айтасиз?

- Бу менинг ёшлик чоғимдаги устозим Виктор Константинович Пужалин.

- Футболдан ташқари яна нималарга қизиқасиз? Яъни, бундан бошқа яна қиладиган ишингиз ҳам борми?

- Оила!!!

- Элдор Шомуродовнинг ўсишга эришаётгани сизни ҳайрон қолдирмаяптими?

- Бу йигит жуда иқтидорли ва меҳнаткаш. Унинг тобора машҳур бўлиб бораётганидан сира ҳайрон қолмайман.

- Россиядаги юртдошларимизнинг ўйинларини томоша қиласизми? Масалан, Остон Ўрунов?!

- Унчалик эмас! Мени асосан жамоавий ўйин кўпроқ қизиқтиради.