Аббосбек Файзуллаев ўзига янги жамоа танлади
Ўзбекистон миллий терма жамоаси ҳужумкор футболчиси Аббосбек Файзуллаев таниқли журналист Игорь Рабинерга берган интервьюсида бир куни “Барселона” футболчиси бўлишни орзу қилишини айтди.
— Ҳамма биладики, жаҳон чемпионати футболчилар учун катта намойиш майдони ҳисобланади. Бу сиз учун ҳам мотивациями?
— Жаҳон чемпионати – жуда катта бозор, бундай ўйинларни бутун дунё кузатади. Лекин ҳозир бу ҳақда ўйламаяпман. Бор эътиборимни жаҳон чемпионатига қаратганман. Ҳозирги асосий орзуим ҳам шу.
— Энг кўп ўйнашни истайдиган чемпионатингиз қайси?
— Испания чемпионати. Доим шу ҳақда орзу қиламан. Аммо вақт кўрсатади.
— Испанияда энг кўп ўйнашни хоҳлайдиган жамоангиз ҳам борми?
— Албатта. “Барселона” – менинг энг катта орзум! Ва унга эришиш учун ҳаракат қиламан. Вақт кўрсатади, аммо охиригача интиламан.
— Ўзбекистонда ҳар қандай орзу амалга ошиши мумкинлигини исботлаган футболчи бор – Абдуқодир Ҳусанов. У сиз учун намунами?
— Унинг тақдири Ўзбекистондаги барча футболчилар учун катта мотивация. Шунингдек, инсон қаердан чиққанидан қатъи назар, ҳатто Ўзбекистоннинг кичик шаҳарчасидан бўлса ҳам, энг катта орзулар амалга ошиши мумкинлигининг исботидир. Агар ишонсангиз ва қаттиқ меҳнат қилсангиз, ҳамма нарса бўлиши мумкин.
— Ҳусанов ҳатто расман “Манчестер Сити”нинг мавсумдаги энг яхши уч футболчисидан бири бўлди. Бу сиз учун ҳайратли ҳолат эмасми?
— Йўқ. Биз у билан ёшлар ўртасидаги жаҳон чемпионатида бирга ўйнаганмиз. Ўшандаёқ унинг албатта Европанинг “топ-5” чемпионатларида ўйнашини ҳис қилгандим. Чунки у кучли жисмоний сифатларга эга, ишонч ва агрессивликни ҳам ўшандаёқ кўрсатган эди.
— Гвардиола ҳақида нималардир айтиб берганми?
— Улар тўп билан жуда кўп ишлашлари ва тактика устида кўп машғулот ўтказишларини айтган.
— Ҳусанов умуман интервью бермайди, ҳатто ўзбек ОАВларига ҳам. Жамоада ҳам шундай камгапми?
— Ҳа, у жуда камтар ва тинч йигит. Ҳамма билан ҳам очиқ эмас, фақат яқин инсонлари билан.
— Сиз у билан яқин дўстмисиз?
— Ҳа. Биз U-20 терма жамоасида бирга ўйнаган тўрт нафар йигит жуда аҳилмиз.
Эслатиб ўтамиз, Аббосбек Файзуллаев ҳам худди Абдуқодир Ҳусанов сингари ўзбек футболидаги энг ёрқин истеъдодлардан ҳисобланади. Фаолиятини ўзи тарбияланган “Пахтакор”да бошлаган ҳужум футболчи 2023 йил августидан 2025 йил июлигача ЦСКА сафида тўп сурди. Шундан сўнг у Туркиянинг “Истанбул Башакшеҳир” клубига кўчиб ўтди.
2025/2026 йилги мавсумда ярим ҳимоячи турк жамоаси сафида 26 та учрашувда майдонга тушиб, 4 та гол урди ва 7 та голли узатмани амалга оширди.
Фикрлар