Файзуллаев мундиал олдидан Каннаваро қандай маслаҳат берганини айтди

Ўзбекистон миллий терма жамоаси ҳужумкор футболчиси Аббосбек Файзуллаев “Спорт-Экспресс” нашрига берган интервьюсида мундиалдаги дебюти олдидан бош мураббий Фабио Каннаваро жамоага қандай маслаҳатлар берганини айтиб ўтди.

— Ҳаётингиздаги илк жаҳон чемпионати бошлангани билан табриклайман. Ҳозир қалбингизда қандай туйғулар бор?

— Жуда хурсандман ва бироз ҳаяжон ҳам бор. Болалигимдан шуни орзу қилганман ва ҳозир дебютга бир қадам қолди. Мен эслайдиган биринчи жаҳон чемпионати 2010 йили Жанубий Африкада бўлган.

Қизиғи шундаки, очилиш ўйини ҳам ҳозиргидек Мексика ва Жанубий Африка Республикаси терма жамоалари ўртасида бўлган, ўша баҳсни эса ўзбекистонлик ҳакам Равшан Эрматов бошқарганди. Ўшанда мен олти ёшда эдим.

Отам билан бирга ўйинни томоша қилиб, ўзимизнинг инсон шундай катта байрамнинг бир қисми бўлганидан хурсанд бўлганимизни яхши эслайман. Ўша пайтдан бошлаб жаҳон чемпионатида иштирок этиш ва ўша ерда ўйнашни орзу қилганман.

— Равшан Эрматов ҳозир ўзбек футболи раҳбарларидан бири ҳисобланади. У сизларга ишлаган жаҳон чемпионатлари ҳақида нималардир гапириб берганми?

— Ҳа, у жаҳон чемпионати биз кўрган барча мусобақалардан бутунлай бошқа даражадаги ҳис-туйғулар эканини айтган.

У ерга чиқиш осон эмас, лекин биз буни уддаладик ва бутун халқимизнинг орзусини рўёбга чиқардик. Тарихимизда биринчи марта финал босқичига йўл олдик ва айнан биз бу ишни амалга оширганимиздан фахрланамиз.

— Фабио Каннаваро сизларни тинчлантиряптими? Ахир у 2006 йилги жаҳон чемпионати ғолиби бўлган ва ҳатто мусобақанинг энг яхши футболчиси, деб тан олинган. Шунинг учун унинг сўзлари сизлар учун алоҳида аҳамиятга эга бўлса керак.

— Албатта. У ўз тажрибасини биз билан бўлишади. Энг муҳими, бизни босимдан соқит қилиб, оғирликни ўз зиммасига оляпти.

У бизга шундай дейди: бу кунлардан завқ олинглар, чунки бу сизларнинг биринчи жаҳон чемпионатингиз. Майдонга чиқиб, эркин ўйнанглар, чунки бизда йўқотадиган нарсанинг ўзи йўқ.

Балким, бу бизга маълум маънода устунлик ҳам берар. Асосий мотивациямизнинг ўзи — халқимиз биз билан фахрланиши.

Албатта, биз энг қийин гуруҳлардан бирида ўйнаяпмиз (Португалия, Колумбия ва Конго Демократик Республикаси).

Бир томондан, Колумбия ва Португалия каби кучли жамоаларга қарши майдонга тушиш ҳам яхши. Аммо Конго Демократик Республикасини кучсиз жамоа, деб айтмаган бўлардим.

Чунки Африка терма жамоалари жисмоний жиҳатдан жуда кучли бўлади ва исталган рақибга муносиб қаршилик кўрсата олади.

Менимча, барча ўйинлар жуда оғир кечади. Фақат биз учун эмас, улар учун ҳам. Чунки улар ҳам бизни яхши билишмайди ва биз уларга кутилмаган сюрприз тайёрлаб қўйишимиз мумкин.

Ўзбекистон миллий терма жамоаси “Жаҳон чемпионати-2026” доирасидаги биринчи учрашувини 18 июнь куни ўтказади. Жамоамиз Колумбия терма жамоасига қарши майдонга тушади. Ўйин Тошкент вақти билан соат 07:00 да бошланади.

Аббосбек Файзуллаев ўзига янги жамоа танлади

Файзуллаев Роналду видео мурожаат йўллаганини тасдиқлади

Ўзбекистон ҳам сенсация қила оладими?

Эксперт Ўзбекистонга бизга ёқмайдиган баҳо берди!

Ҳусановни 500 долларга ўйнаб юрганини кўрганман!