19-сана 19-тур ёхуд кимнидир мағлубиятли ёки ғалабали сериясига чек қўйиладими?

Бугун 19 сентябрь ва айнан бугундан Суперлиганинг 19-турига старт берилади. 7 та жуфтликдаги муросасиз беллашувлар 23 сентябрга қадар давом этади. Хўш, бу сафар кимда қандай имконият?

19 сентябрь

19:30. “Нефтчи” – “Қизилқум”

Бу ўйин Яйпандаги “Ўзбекистон” стадионига кўчирилганидан хабарингиз бўлса керак. Фарғонадаги “Истиқлол” аренаси 5 октябрь куни бўладиган Ўзбекистон Кубоги финали учун ёпилди. “Нефтчи” эса вақтинча “Турон” стадионидан фойдаланиб туради. Аллақачон чемпионликдан мосуво бўлган фарғоналиклар ҳеч бўлмаганда кучли учталикка кириб қолиш илинжида. Ҳозирги кунда аксарият клубларнинг савияси бир хил. Шундан келиб чиқиб айтадиан бўлсак, иккала жамоада имконият тенг.

20 сентябрь

17:00. “Локомотив” – “Навбаҳор”

“Локомотив” ўтган турда Андижонда жуда муҳим ғалабани қўлга киритиб қайтди. “Навбаҳор” эса ўз уйида “Насаф”га ютқазиб қўйди. Крестинин жамоаси ғалабадан руҳланиб “Навбаҳор”га қарши ҳам ўзгача руҳда тайёрланаётгани табиий. Агар наманганликлар ўз имкониятидан фойдаланиб, маҳоратини кўрсатадиган бўлса, унда “Локомотив”га оғир бўлади.

19:15. “Сўғдиёна” – “Андижон”

Медаллар учун курашаётган Иван Бошкович жамоаси ўтган турда “Қизилқум” билан беллашувда аранг мағлубиятдан қутулиб қолганди. “Андижон” эса иккинчи даврани қаторасига бешта мағлубият билан бошлади. “Бургутлар”га ҳам ғалаба сув ва ҳаводек зарур. Жиззахда қаттиқ жанг кечади. Балки биргина гол ўйин тақдирини ҳал қилиши мумкин.

21 сентябрь

17:00. “Металлург” – “Пахтакор”

“Металлург” ҳамон қора чизиқдан чиқиб кета олмаяпти. Мавсум бошидан бери чемпионатда бирор марта ғалаба қозона олмаган бекободликлар қаршисида энди “Пахтакор” турибди. Ҳар ўйин “Металлург” учун финалдек. Бироқ жамоа ўзгаришларга қарамай, имкониятлардан фойдалана олмаяпти. Бу кетишда жамоани про лига кутиб олади.

19:15. “Олимпик” – “Динамо”

Тошкентда яхши ўйин бўлади. “Олимпик” ҳам, “Динамо” ҳам ҳужумкорликни ёқтиради. Катта эҳтимол билан майдонда очиқ футбол кўрамиз. Турнир жадвалида улар ёнма-ён боришмоқда. Денис Коростиченко “Олимпик”га бош мураббий бўлганидан бери ҳали ғалаба қозонгани йўқ. “Динамо” ўтган турда уйида “Бунёдкор”га 2:3 ҳисобида имкониятни бой бериб қўйди. Қизиқарли ва томошабоп ўйин кўрамиз. Балки голлар ҳам кўпроқ бўлар.

22 сентябрь

19:30. “Сурхон” – “Бунёдкор”

Ўз ўйини билан кўпчиликда илиқ таассурот қолдираётган “Сурхон” бу турда “Бунёдкор”ни қабул қилади. “Қалдирғочлар” иккинчи даврага келиб ўзини ўнглаб боряпти. Ўйинида ижобий ўзгариш сезиляпти. Бу беллашув ҳам жуда муросасиз ўтиши шубҳасиз. “Сурхон”да нисбатан устунлик бўлиши мумкин. Фақат буни таблода ҳам акс эттириши лозим. “Бунёдкор”ни эгаллаб турган ўрнидан келиб чиқадиган бўлсак, уларни дуранг ҳам қаноатлантирмайди.

23 сентябрь

19:00. “Насаф” – ОКМК

Турнинг марказий ўйини Қаршида бўлиб ўтади. Рўзиқул Бердиев ва Миржалол Қосимов шогидларининг тўқнашувини кузатиш ҳар томонлама қизиқ. “Насаф” чемпионлик учун жуда яхши имкониятга эга. Қаршиликлар 2-ўриндаги ОКМКдан 6 очкога илгарилаб кетишган. Агар Бердиев жамоаси ғалаба қозонадиган бўлса, чемпионликни деярли ҳал қилиб қўйган бўлади, ишонаверинг. Жамоа жуда ишончли ва чемпионларга хос тарзда ўйин намойиш этмоқда. “Насаф” ОКМК тўсиғидан ўтадими ёки Қосимов жамоасидан сюрприз кўрамизми? Бу учрашувни ўтказиб юборманг.

Шуҳратбек Жўраев.