2 та қизил, 2 та пенальти - марказий учрашувда ПСЖ камбэк қурбонига айланди

УЕФА Чемпионлар Лигаси 3-туридан ўрин олган "РБ Лейпциг" - ПСЖ беллашуви ўз ниҳоясига етди. Унда майдон эгалари 2:1 ҳисобидаги ғалабани тантана қилди.

Дастлаб, Ди Мариянинг тезкор голи билан олдинга чиқиб олган парижликлар, кейинчалик ўз дарвозасидан 2 та гол олиб чиқишга мажбур бўлди. Кристофер Нкунку кучли зарбаси билан тарози паллаларини тенглаштирган бўлса, Эмиль Форсберг пенальтидан жамоасига 3 очко келтирган голни киритди.

Эътиборлиси, меҳмонлар сафида Идрисса Гейе ҳамда Преснель Кимпембе иккитадан сариқ карточка ишлаб олиб, майдондан четлатилди. Шунингдек, 16-дақиқада Анхель Ди Мария пенальтидан гол ура олмади. Унинг зарбасини дарвозабон қайтаришга муваффақ бўлди.

• 90+6'
  

  Учрашув якунланди. Матнли трансляция Жавоҳир Азимов томонидан олиб борилди!

• 90+5'
  

  Катта тезликда қарши ҳужумга ўтаётган Юссуф Поульсенни ортдан чалиб йиқитгани учун Преснель Кимпембе майдондан четлатилди.

• 90+4'

  ПСЖ катта иштиёқ билан олдинга ўтмоқда. Натижада, қарши ҳужумларда "РБ Лейпциг" футболчилари яхши имконият ҳосил қиляпти.

• 90+2'

  Ди Мария стандарт вазиятдан жарима майдонига тўп оширди. Дарвозабон уни ушлаб олди.

• 90'
  

  Асосий вақтга 5 дақиқа қўшиб берилди.

• 87'

  Ўйин сўнгини ПСЖ футболчилари фаол ҳужумлар билан ўтказмоқда. Уларга гол зарур!

• 84'
  

  Алессандро Флоренци ўз ўрнини Рафинья Алькантарага бўшатиб берди.

• 82'

  Забитцернинг зарбаси Эррерага тегиб, ўз траекториясини ўзгартирди.

• 79'

  Стандарт вазиятдан Анхелиньо тўпни жарима майдонига узатди. Бироқ шериклари унинг ниятини тушуна олишмади.

• 76'
  

  Эмиль Форсберг ҳамда Амаду Хайдара учун ўйин якунланди. Улар ўрнида ўйинни Жастин Клюйверт ва Тайлер Адамс давом эттириб қўяди.

• 74'
  

  Сарабия ва Левен Кюрзава захирага олинди. Улар ўрнида Тило Керер ҳамда Митчел Баккер ўйинни давом эттиради.

• 72'

  Мойзе Кин икки рақиби орасидан тўпни олиб ўта олмади. Яхши вазият қўлдан кетди.

• 69'
  

  Идрисса Гейе иккинчи сариқ карточкани олиб, майдондан четлатилди. У жамоасини анча қийин вазиятга солиб қўйди.

• 67'
  

  Рақибининг оёғига зарба бериб юборгани учун Левен Кюрзава огоҳлантирилди.

• 64'
  

  Дани Ольмо ҳамда Норди Мукиеле майдонни тарк этди. Улар ўрнига Юссуф Поульсен ва Беньямин Хенрикс ўйинга қўшилди.

• 62'

  Ди Мариянинг Флоренцига оширган тўпини дарвозабон ушлаб олди.

• 60'

  Ҳисобда ортда қолишни бошлаган парижликлар фаолликни оширди.

• 57'
  

  ГООООООООООЛЛЛЛЛЛЛ! Форсберг жамоасини ҳисобда олдинга олиб чиқди.

  Ўзидан чап бурчакка кучли зарба йўллаган Эмиль дарвозабонга имконият қолдирмади.

• 56'
  

  Видеотакрорларни кўрган ҳакам пенальти белгилади.

• 55'

  Тўп жарима майдони ичида Кимпембенинг қўлига тегиб кетди. Ҳакам ВАРни ўз кўзлари билан кўриш учун майдон четига йўл олди.

• 54'

  Мойзе Кин узоқ масофадан ўз омадини синаб кўрди. Зарбага аниқлик етишмади.

• 53'

  Форсбергнинг кучли зарбаси тўсин юқорисидан ўтиб, майдонни тарк этди.

• 51'

  Иккинчи қирқ беш дақиқалик ҳам анча фаол ҳужумлар остида бошланди.

• 48'

  Мойзе Кин қанотда Упамеканони алдаб ўта олмади.

• 46'
  

  Иккинчи бўлим бошланди!

• 46'

  Футболчилар майдонга қайтди. Биз ҳам қайтамиз!

• 45+1'
  

  Танаффус!

• 45'
  

  Биринчи таймга 1 дақиқа қўшиб берилди.

• 44'

  ПСЖнинг тезкор қарши ҳужуми Сарабиянинг ноаниқ узатмаси туфайли узилиб қолди.

• 42'
  

  ГООООООООООЛЛЛЛЛЛЛ! Нкунку ҳисобни тенглаштирди!

  Жарима майдони ташқарисидан зарба берган Нкункунинг уринишини Навас қайтара олмади.

• 39'
  

  Сарабиянинг зарбасини дарвозабон қайтарди. Қайтган тўпга зарба йўллаган Киннинг уринишидан сўнг, дарвоза яна бир бор ишғол этилди. Аммо бу сафар ҳам офсайд туфайли гол инобатга олинмади.

• 38'
  

  Дарвозабон билан бирга-бир вазиятга чиққан Ди Мария тўпни Гулачининг устидан ошириб дарвозага киритди. Бироқ ён ҳакам ўйиндан ташқари ҳолат борлигини маълум қилди.

• 37'
  

  Идрисса Гейе рақибига нисбатан қоида бузгани учун огоҳлантирилди. Кескинлик ортиб бормоқда.

• 35'
  

  Андер Жррера ва Дани Ольмо ўзаро курашга киришди. Ольмо рақибининг юзига уриб юборди. Эррерага тиббий ёрдам кўрсатилмоқда.

• 32'
  

  Жарима майдонига киришга қийналаётган "буқалар" узоқ масофадан омадини синаб кўрмоқда. Форсбергнинг зарбасини Навас ушлаб олди.

• 30'

  Тухель шогирдларининг чуқур прессинги мезбонларни орқа чизиқда кўп вақт давомида қолиб кетишига сабаб бўляпти.

• 28'

  Ди Мариянинг жарима майдонига оширган тўпи Мойзе Кингача етиб келмади.

• 25'
  

  Майдон марказида Конате рақибига нисбатан жиддий қўполлик ишлатди. Ҳакам уни дарҳол огоҳлантирди.

• 24'

  Стандарт вазиятдан оширилган тўпни "Лейпциг"дан ҳеч ким қабул қила олмади.

• 22'

  Майдон эгалари ҳужумлар уюштирмоқда. ПСЖ ҳимоячилари орқа чизиқда ишончли ҳаракат қиляпти.

• 19'
  

  Нкункудан алданган Кимпембе рақибини чалиб йиқитди. Ҳакам уни сариқ карточка билан жазолади.

• 18'
  

  Форсберг рақиб ҳимоячиларининг сунъий офсайдига тушиб қолди.

• 16'
  

  Нуқта қаршисига келган Ди Мариянинг зарбасини Гулачи қайтарди. Ўзидан чап томонга отилган дарвозабон тўп йўналишини аниқ топа олди.

• 16'
  

  Дайо Упамекано огоҳлантирилди.

• 15'
  

  Мойзе Киннинг зарбасидан сўнг, тўп Упамеканонинг қўлига тегди. Ҳакам 11 метрлик нуқтага ишора қилди.

• 13'

  Парижликлар уюштираётган эрта прессинг мезбонларни хато қилишга мажбур қилмоқда.

• 11'

  Упамеканога нисбатан Кин ҳужумда қоида бузди.

• 9'

  Мойзе Кин жарима майдони ичида йиқилиб тушди. Ҳакам унга ўрнидан туриши лозмлигини тушунтирди.

• 8'
  

  Мукиеле яқин масофадан зарба берди. Навасдан яхши сейв! Қайтган тўпни яна дарвозага йўллаган Анхелиньонинг уриниши ҳимоячидан ўтмади.

• 6'
  

  ГООООООООООЛЛЛЛЛЛЛ! Ди Мария ҳисобни очди!

  Мойзе Киннинг узатмасидан сўнг, дарвозабон билан бирга-бир вазиятга чиқиб борган Анхель дарвозабонни ожиз нуқтасини топа олди.

• 5'

  Ольмога узатилган тўпни ҳимоячилар фаол ўйин туфайли қайтариб қолди.

• 3'

  Меҳмонлар илк дақиқалардан тўп назоратини қўлга олишга уринмоқда.

• 1'
  

  Ўйин бошланди!

• 0'

  Сардорлар иштирокидаги расмий маросимлар ҳам ортда қолди. Старт учун барчаси шай!

• 0'

  Футболчилар майдонга тушиб келди. Чемпионлар Лигасининг мафтункор мадҳияси янгради.