Биласизми? Кетма-кет 3та ЖЧ финалларидан буён ғолиб номи асосий вақтда аниқланмаяпти

Барчага яхши маълум бугун Москвадаги муҳташам “Лужники” стадионида барчамиз орзиқиб кутган ЖЧ-2018нинг ҳал қилувчи финал баҳси ҳам бўлиб ўтади.

Ушбу учрашув олдидан бир қизиқарли факт мавжуд. Гап шундаки, сўнгги пайтларда жаҳон чемпионати финалларида ғолиб асосий вақтда эмас, балки қўшимча бўлимлар ёки пенальтилар сериясида аниқланмоқда.

Сўнгги бор асосий бўлимда 2002 йил Бразилия терма жамоаси Германия устидан ғалаба қозонган. Шундан буён ўтказилган 3та мундиал финалида мухлислар чемпион номини камида 120 дақиқадан сўнг билишмоқда.

Ўз навбатида бу сафари финалга етиб келган Хорватия терма жамоасини алоҳида таъкидлаш лозим. Боиси, улар финалгача бўлган плей-оффнинг барча учрашувларини 120 дақиқадан ўтказиб келишди. Улар учун ушбу ўйиндаги экстра таймлар кетма-кет 4-си бўлади.

Эслатиб ўтамиз, Франция – Хорватия баҳси бугун Тошкент вақти билан соат 20:00да бошланади.