“Челси”га трансфер таъқиқи қўйилиши кимга фойда-ю, кимга зарар? (Эркин Ғайбуллаев блоги)
Ads

“Челси” учун оғир паллалар давом этмоқда. Бу сафар кўрсатаётган ўйин натижаси эмас, ФИФА уларни қийин вазиятга солиб қўйди. ФИФА лондонликларни икки трансфер бозорида янги футболчилар сотиб олишини таъқиқлаб қўйди. Бу “кўклар”нинг ёш футболчиларни имзолашда йўл қўйган хатолари ортидан содир бўлди.

Шу тариқа улар шу йилнинг ёзи ва 2020-йилнинг қишки трансфер бозорида ўз сафини тўлдириш ҳуқуқидан маҳрум қилинди.

Бу қарор Европанинг энг йирик инвестори жамоасида кузатилиши вазиятни янада мураккаблаштиради. Роман Абрамович 2003-йилда клуб хўжайинига айланганидан бери асосий таркиб ва ёшлар учун кенг кўламдаги ишларни амалга оширди. Хўш, бундай таъқиқдан кимга фойда-ю кимга зарар?

Фойда: “Челси” академияси

Бундан энг катта фойда кўрадиган томон бу жамоада ўз имкониятини кутаётган ривожланишдаги футболчилар ҳисобланади. Бир тарафдан клуб академияси Англиядаги энг кучлиларидан бири ҳисобланади. Аммо уларнинг ҳаммаси ҳам асосий таркибга қўшила олмаслиги дилни хира қилаётган эди.

Ўтган йили бутсасини михга илган афсонавий сардор Жон Терри асосий таркибда қўним топган сўнгги клуб тарбияланувчиларидан бири ҳисобланади. Террининг жамоадаги фаолияти 1998-йилдан 2017-йилгача давом этди. Миллий ва халқаро даражада кўплаб совринлар ютган тарбияланувчисидан кейин бошқа бир жиддий авлодни асосий таркибда ўйната олмади.

Бундай таъқиқ ёшлар учун эшикларни очиб беради. “Челси”нинг асосий таркиби ёшара бошлаётгани ҳаммага сир эмас. Ёзда эса клуб бу ишни тезроқ амалга ошириши мумкин. Клубнинг бир қатор ёш истеъдод эгалари ижарада юришибди. Шулардан Тэмми Абрахам, Мейсон Маунт ва Льюис Бейкерлар кўрсатган сабри ва меҳнатига қарамай, клубни тарк этишни маъқул кўришганди. Хадсон-Одои эса сўнгги вақтлардагина ўйин амалиётига эга бўла бошлади. Асосий таркибнинг баъзи етакчилари клубни тарк этишни хоҳлаб қолса, албатта уларнинг ўрнини ёшлардан тўлдиришдан бошқа вариант қолмайди.

Зарар: Маурицио Сарри

Ҳаммасидан Саррига анча қийин бўлмоқда. Сўнгги вақтлар барча ташвиш унинг бошига келмоқда. Амалдаги чемпион “Манчестер Сити”дан шармандали 6-0 ҳисобидаги мағлубият ортидан Англия Кубогида “Манчестер Юнайтед”дан таслим бўлишини ҳазм қилиш осон эмас.

Лига Кубогида “шаҳарликлар”дан учралиши мумкин бўлган эҳтимолий мағлубият унинг истеъфога чиқарилиши билан якун топиши ҳақидаг хабарлар тарқалмоқда. Аммо ФИФАнинг қўйган таъқиқи унга бир тарафдан асқотиши мумкин. Чунки бирорта мураббий “қўли боғлиқ ҳолда” жамоани бошқаришни истамайди.

Унинг қатъий табиатини олайлик. Ўзгариш бўлмаётган бўлса ҳам, у ўз қарашларига содиқ қолишни хуш кўрадиганлардан. Агарда тўғри қарорларни қабул қилишда адашишда давом этадиган бўлса, унинг жамоада қолишига ҳеч қандай кафолат йўқ.

Фойда: Кучли олтилик клублари

“Челси” “Манчестер Сити”, “Ливерпуль”, “Тоттенхэм Хотспур”, “Манчестер Юнайтед” ва “Арсенал” билан бирга инглиз футболининг энг кучли клубларидан бири ҳисобланади. Аммо Чемпионлар Лигасида шулардан фақатгина тўрттаси иштирок этиши мумкинлигини инобатга оладиган бўлсак, иккитаси нуфузли турнирда иштирок этмасликка маҳкум. Бу мавсумда улар ва “Арсенал” Европанинг энг муҳим турнирида иштирок эта олмаяпти. Агарда Европа Лигасини юта олишмаса, улар яна ЕЧЛдан қуруқ қолишади.

Трансфер таъқиқи эса кучайишга имкон бермайди, айниқса рақиблари буни амалга оширишса ва янада кучли клубга айланиши ортидан Абрамович клубига осон бўлмайди. Бундай ташвиш ва хаос клубни янада ботқоқлик сари етаклаши мумкин.

Зарар: Роман Абрамович

Шубҳасиз Абрамович “Челси” учун ажойиб танлов. Гарчи айтадиган гаплар кўп бўлса ҳам. Айнан унинг қўли остида “кўклар” инглиз футболининг асосий кучларидан бирига айланди. Бешта Премьер Лига чемпионлиги ва саккизта миллий Кубок билан бирга, 2012-йилги ЕЧЛ ва 2013-йилги Европа Лигаси бош совринлари рус олигархининг узоқ йиллик меҳнати ва сайъи-ҳаракатлари туфайли эришилди. Муваффақиятгина рус олигархини қаноатлантиради. Омадсизлик унга бегона.

Биз буни у клуб бошқарувига келганидан бери тўққизта мураббий билан ишлаши ортидан кўриб олдик. Уларнинг ичида ҳатто Жозе Моуриньо ҳам бор. Юқорида айтганимиздек, қўйилаётган таъқиқ италиялик мураббийнинг клубдаги фаолиятини бироз бўлсада, узайтириши мумкин. Аммо Абрамович исталган вақтда уни истеъфога чиқариши мумкин. Абрамовични эса истамаган муаммоси билан тўқнаш келиши режаларига таъсир қилмай қўймайди.

Фикрлар

Фикр қолдириш учун авторизациядан ўтинг!
&
darwesh
23/02/2019 16:18
манимча, бундан челси ютказади, чунки асосий максад чемпионлар лигасида уйнаш