«Дер Профессор» ёҳуд Венгер учун идеал жамоа топилди

Арсен Венгер ўтган мавсум якунидан бери ишсиз юрибди ва янги чақириқларни кутиб юргани ҳақида яқинда ОАВда хабарлар тарқалган эди. Франциялик мутахассис учун «Бавария» идеал жамоа бўлиши мумкин.

Мюнхенликлар учун янги давр бошланиши мумкин. Ўтган ўн йилликда клуб бир қатор инқирозларни бошидан кечирганига қарамай, доим вазиятни ўнглашга ва яна буюкликка қайтишнинг уддасидан чиқиб келди.

Ўша инқирозларнинг биргина ечими бор эди. У ҳам бўлса Юпп Хайнкес! Афсонавий мураббий ҳар доим клуб боссларининг қўнғироқларига лаббай дея жавоб берди ва ўйинини топа олмаётган «Бавария»га катта ёрдам бериб келди.2012/13-йилги треблдан кейин Хайнкес истеъфога чиқди ва унинг ўрнини Пеп Гвардиола эгаллади. Бу мураббийнинг учинчи марта клубга қайтиши эди. Аммо клуб ўтган мавсум стартини Карло Анчелотти қўли остида жуда ёмон бошлаганидан кейин Ули Хёнесс яна бир марта Хайнкесга мурожаат қилди ва вазиятни сақлаб қолди.

«Бавария» афсонавий мураббийидан яна бир мавсум қолишини илтимос қилди. Аммо Хайнкес буни рад қилди. 73 ёшли мураббий «Альянс Арена»даги жойига Томас Тухелни тавсия қилди. Бироқ «Боруссия Дортмунд»нинг бош мураббийи «ПСЖ»нинг «ёғли» таклифига рад жавобини бера олмади. Шу тариқа мюнхенликлар кучли мутахассисни олиб кела олмади. «Бавария»нинг собиқ ярим ҳимоячиси Нико Ковач «Айнтрахт» билан катта шов-шув кўтарганидан кейин мажбуран олиб келинди. Хорватиялик мураббий янги жамоасидаги фаолиятини анча ёрқин бошлай олди. Аммо унинг сўнгги вақтларда кўрсатаётган натижалари қўрқинчли тус ола бошлади ва у катта босим остида қолиб кетди. 47 ёшли мутахассис ҳануз янги ғалаба формуласини қидириш билан овора.

Чемпионлар Лигасининг сўнгги турида «Бенфика»ни 5-1 ҳисобида енгиши эҳтимол сал танқидларни пасайишига сабабчи бўлар, аммо Хёнесс барибир қишда янги мураббий олиб келишни ният қилган.

Бунга ўтган ҳафтада «Фортуна» билан эришилган дурангдан кейин «Бавария»дек клубга аутсайдер билан эришилган қониқарсиз натижа таъсир қилмай қўймаган. Шу тариқа улар Бундеслиганинг қаторасига тўрт уй учрашувида ғалаба нималигини билмай келмоқда ва анти-рекорд ҳам ўрнатилди. «Бугунги натижани қабул қилиб бўлмайди. Яқин бир неча кун ичида биз нега ёмон ўйнаётганимизни тушунишга сарфлаймиз. Айни вақтда бизни ўйлантираётган муаммо шу» – деган Хёнесс.

«Бавария» ва айниқча Арьен Роббен “Бенфика”га қарши учрашувда олдингидек кучли футбол намойиш қилишди. Аммо яна бир икки қониқарсиз натижа такрорланса, Ковачни ҳеч ким клубда ушлаб қололмайди.

Ишлар чаппасига кетса ҳам, Ҳёнесс бу сафар Хайнкесни чақира олмайди. Отахон-мураббий яна клубга қайтиш ниятида эмас. Бироқ Хёнесснинг баҳтига бошқа бир ветеран-мураббий борки, у клуб учун жуда мос тушиши мумкин.

Арсен Венгер «Бавария»даги вазиятни ўнглай олиши ва уларни яна чўққига олиб чиқишга қодир ҳисобланади. Ковачда юлдуз футболчилар билан ишлаш тажрибаси йўқ. Яқинда Хамес Родригес «биз Франкфуртда эмасмиз» дея мураббийга шаъма қилганди.

Премьер Лиганинг уч карра соҳибида Родригес, Роббен, Рибери, Мюллер ва бошқа юлдузлар билан ишлашда муаммо туғилмайди.

69 ёшли мутахассис худбин футболчилар билан қандай ишлашнинг ҳадисини олган ва ҳар қандай футболчи мунтазам ўйин амалиётига эга бўлмасада, Венгерни ҳурмат қилиши аниқ.

Гвардиола эрасидан бери клуб тўпга эгалик қилган ҳолда ҳужумкор ўйин кўрсатишга боғланиб қолган. Венгер ҳам «Арсенал»даги фаолияти давомида турли хил тактика ва услубларни синаб кўрган.

«Бавария» айни вақтда 4-2-3-1 ўйин схемасида ўйнамоқда. Бу эса франциялик мураббийга анча таниш услуб. Бундай схемада Хамес Ўзил каби “ўнлик” вазифасини бажариши, Мюллер ва Гнабрилар қанотлардан жой олиши мумкин.

«Бавария» бош мураббийлигига Зинедин Зидан ҳам боғланмоқда, Венгер каби у ҳам ҳозирда ишсиз юрибди. Аммо «Реал»нинг собиқ мураббийи немисча билмайди. Тил масаласи мюнхенликлар учун анча жиддий масала. Ўтган асрнинг сўнгги ўнйиллиги ўрталарида, Жованни Трапаттони давридан бошлаб бу анъана давом этиб келмоқда. Ўшанда италиялик мураббийнинг ютган совринларидан кўра унинг ғалати матбуот-анжуманлари анча таниқли эди.

Венгер эса яқинда футболдан узоқлашмаслигини, кейинги клуби Премьер Лига вакили бўлмаслигини айтиб ўтди.

Немисчани биладиган «профессор» учун «Бавария» мос клуб бўлиши мумкин. «Le Professeur», «The Professor» тахаллуслари билан танилган мутахассис энди «Der Professor»га айланиб қолса ажаб эмас.