Федерер Австралия очиқ чемпионати финалида ғирром ишлатганликда айбланди
"Катта дубулға" туркумидаги энг нуфузли тўрт турнирдан дастлабкиси - Австралия очиқ чемпионатининг бош соврини швейцариялик Рожер Федерерга насиб этди. Тажрибали теннисчи бош соврин учун ўтказилган беллашувда азалий рақиби испаниялик Рафаэль Надални мағлуб этди.
"Катта дубулға" туркумига кирувчи Уимблдон чемпионатининг 1987 йилги ғолиби австралиялик Пэт Кэш швейцариялик теннисчи финал учрашувида тиббий танаффус олиб ғирромга йўл қўйганини айтмоқда.
- Рожер Федерер жароҳати безовта қилгани учун тиббий танаффус олгани йўқ, - деди Пэт Кэш. - У бешинчи сетдан олдин нафасини ростлаб олди. Бу рухсат этилган бўлса-да, ғирром усул. Қоидалар буни бундай танаффус олишни тақиқламайди. Шунга қарамай бу барибир ғирром.
Австралия очиқ чемпионати финали беш сет давом этиб, унда Рожер Федерер 6:4, 3:6, 6:1, 3:6, 6:3 ҳисобида зафар қучганди.
Фикрлар