Геннадий Головкин чемпионлик жангига яқин турибди

Қозоғистонлик Геннадий Головкин (38-1-1, 34КО) яқин вақт ичида ўрта вазн тоифасида WBO камари соҳиби америкалик Деметриус Андраде (27-0, 17 КО) билан жанг қилиш ҳуқуқини қўлга киритиши мумкин. Бу ҳақда Бутунжаҳон бокс ташкилоти президенти Франциско Валькарсель BoxingScene нашрига берган интервьюсида маълум қилган.

Феврал ойида WBOнинг янгиланган рейтингида Головкин бир поғона кўтарилган. Бу унинг чемпионлик камарига даъвогарлардан эканлигини англатади.

– Ёки саралаш жангни белгилаймиз, ёки Головкин Андраденинг чемпионлик камарига даъвогар бўлади. Биз бу масалани 21 февралгача ҳал қиламиз, – дейди Валькарсель.

Аввалроқ ўрта вазнда WBO рейтингини Билли Жо Сондерс (27-0, 13 КО) бошқараётган эди, бироқ британиялик боксчи иккинчи ўрта вазнга ўтган.

Январда Головкин DAZN стриминг тизими ва FOX ҳамда Showtime билан Premier Boxing Champions проекти бўйича музокаралар олиб борган. DAZN вариантлар орасида қозоғистонлик боксчига Андраде билан жанг қилишни таклиф қилган, кейин мексикалик Сауль “Канело” Альварес (51-1-2, 34КО) билан учинчи жангни ўтказишни режалаштирган. Головкин Сауль билан бўлган олдинги жангда WBC, WBA (Super) ва IBO чемпионлик камарларини йўқотган.

Эслатиб ўтамиз, WBO камарини Головкин профессионал рингда қўлга кирита олмаган. У бир неча марта Сондерс билан жанг қилишни таклиф қилган ва мутлоқ жаҳон чемпиони бўлишни истаган, аммо якунда тўқнашув ташкил қилинмаган.