Игуаиннинг “Милан”га ўтиши кимга фойда, кимга зарар?

Гонсало Игуаин “Ювентус”дан ижара асосида “Милан”га ўтиши ойдинлашди ва Роналдуга рақобатчилик қилмайдиган бўлди. Хўш, унинг “россонерилар”га ўтишидан кимга фойда-ю кимга зарар?

Игуаинни дастлаб “Челси” бош мураббийига айланган собиқ устози Маурисио Сарри олиб келишни истаган эди. Бироқ аргентиналик ҳужумчи энди Женнаро Гаттузо қўли остида тўп суради.

Guardian нашрига кўра миланликлар унинг ижараси учун аввал 16 миллион фунт тўлайди, мавсум якунида эса 32 миллион фунт трансфер ҳуқуқини расмийлаштиради. Ушбу келишув кимнинг фойдасига ишлайди?

Леонардо

“Милан” ижрочи директори ва собиқ футболчи “Милан”га келган заҳоти клубни шонли даврига қайтариш мақсадида жиддий иш бошлади ва бу транфсер унинг ютуғи дебочаси дейишимиз мумкин.

Аргентиналик ҳужумчи А Серияда бир неча мавсумдан бери юқори савиядаги ўйинларини намойиш қилиб келмоқда. “Милан” ўтган мавсумда 56 гол урди ва ўз дарвозасидан 42 гол ўтказиб юборди. Кўриниб турибдики, “Милан” кўпроқ голлар уришга муҳтож. 2017-йилда клубни қабул қилиб олган Гаттузога топ савиядаги ҳужумчи керак.

Игуаиннинг келиши бу кўзланган мақсадни ҳақиқатга айлантириши мумкин.

Алваро Мората

Алваро дарҳақиқат ажойиб ҳафтани бошидан кечирди. Дастлаб унинг оиласида эгизак фарзандлар туғилган бўлса, кейингиси Игуаиннинг “Милан”га ўтиши бўлди.

Боиси Игуаиннинг лондонликлар сафига ўтиши анча вақтдан бери оғиздан тушмай келаётган эди. Бу эса Моратанинг “Стэмфорд Бридж”дан кетишини англатар эди. Бу эса “туманли Албион”да атиги бир мавсум ўтказган испаниялик ҳужумчига руҳий зарба бўлиши муқаррар эди.

Энди воқеалар ривожи бундай тус олгач Маурисио Сарри Моратага ўзини кўрсатиш учун яна бир марта имконият беришга мажбур. Агарда Мората шунга қарамай, “Челси”ни тарк этадиган бўлса, “Ювентус” эшиклари у учун қайта очилиши ҳам мумкин.

Леонардо Бонуччи

Италиялик ҳимоячи бир йил аввал туринликларни 37 миллион фунт эвазига тарк этганди. Унинг “Милан”даги фаолияти у ўйлаганчалик кечмади. “Ювентус” ҳам ўз навбатида тажрибали собиқ ҳимоячисини қайтаришга қарши эмасди. Апрелда Чемпионлар Лигаси доирасида “Реал”дан учралган 0-3 ҳисобидаги мағлубият “Ювентус” раҳбариятининг мақсадини тушунишга ёрдам беради.

Энди 31 ёшли Италия сардори “кекса синьора” ҳимоясига қайтди, ҳужумда Роналду бор. Назарий жиҳатдан барчаси кўнгилдагидек кечмоқда.

Зарар

Маурисио Сарри

Сарри собиқ шогирдини “Стэмфорд Бридж”да кўришни жуда-жуда истаганди. У буни амалда бажара олмади ва янги жамоасидаги мақсадларини Мората ва Жиру билан ҳал қилишга уриниб кўради.

“Челси” Чемпионлар Лигасида иштирок эта олмайди, уларга “чақновчи” ҳужумчи керак. Азар ва Виллиан клубда қоладиган бўлса ҳам, бу етмаслиги мумкин.

Криштиану Роналду

Икки ҳужумчи “Реал Мадрид”да тўрт мавсум биргаликда ҳаракат қилди ва бу вақт ичида улар 250 гол уришга эришишди.

“Ювентус” Роналдунинг трансферини амалга ошириш учун қарийб 100 миллион фунт сарфлади. “Кекса синьора” клуб молиявий бюджетини енгиллаштиришни футболчиларни сотиш орқали ҳал қилиши маълум эди. Бунинг дастлабки қурбони Игуаин бўлди.

Игуаин клубда қолса қолмаса, Роналду “Юве” юлдузи бўлиши аниқ эди. “Милан”да энди Игуаин яққол юлдузга айланади.

Никола Калинич

Хорватиялик ҳужумчи ёмон мавсумини Игуаин келиши билан давом эттириши мумкин. Калинич Далич қўли остида Мундиалда Хорватиянинг биринчи ўйинида иштирок этди. Кейин эса жароҳатини баҳона қилиб ўйинга тушишдан бош тортди.

Шу тариқа 30 ёшли ҳужумчи уйига равона қилинди ва терма жамоасининг финалга қадар етиб борганини телевизор орқали томоша қилди.

Клубдаги фаолияти эса ундан ҳам баттар. Ўтган мавсумда “Милан” сафида олти гол уришга эришди. Бу эса Чемпионлар Лигасига чиқишни истаган жамоа учун камлик қилади. Игуаиннинг келиши эса унинг “бортдан” тушиб қолишини англатади.

Эркинжон Ғайбуллаев тайёрлади.