«Камп Ноу»даги драма ёхуд «янги Мессилар» пайдо бўлганда

Испания дербисидаги бундай йирик ғалаба 2015-йил қишидан бери биринчи марта йирик ҳисоб қайд этилди. Ушбу ғалаба туфайли «Барса» турнир жадвалида пешқадам бўлиб олди ва энг яқин таъқибчисидан икки очко, азалий рақибидан эса етти очкога илгарилаб кетди.

Хўш, учрашувдан нималар ўргандик?

1. Луис Суарес «Эль Классико»нинг янги қироли

Уругвайлик ҳужумчи «Эль Классико»даги илк саҳифасини тўрт йил олдин бошлаганди. Ўшанда ўн дақиқа ичида голли узатмани амалга оширганди. Бу эса Суареснинг қиладиган ишлари ҳали олдинда эканлигига керакли кўрсаткич бўлганди. Суарес ҳозиргача энг йирик дербида 10 ўйинда 9 гол уришга эришган.

На Криштиану Роналду, на Лионель Месси Суарес «Барселона»га келиб қўшилганидан бери бундай статистика билан мақтана олмайди. Кеча «Эль Классико» тўпурарисиз (Месси) ўйнаган каталонияликлар юлдуз ҳужумчига муҳтож эди.

Луис Суарес эса бунга мажбур бўлди. Мессининг жароҳатидан кейин ўртамиёна ўйинини намойиш қилаётган ҳужумчи Чемпионлар Лигасида «Интер»га қарши ва энди «Реал»га қарши ўзида куч топа олди. Унинг ишлаган пеналтиси ва узоқдан «ўқдек» йўллаган зарбаларига Тибо Куртуа ҳеч қандай чора топа олмади.

У Куртуа дарвозасига хет-трик уриб «Мессининг иши»ни бажарди. Бу Суареснинг супер «Эль Классико»си бўлди. Чунки у қўпол техник хатоларга, қарорларга йўл қўймади. Сўнгги зарбаларнинг кўпида у ақлли қарорлар қабул қилди.

1. Хорди Альба – янги Месси

Жамоага Эрнесто Вальверде келганидан кейин Альба ўзи шундоғам кучли ўйинини янада кучайтирди ва Неймар кетгач жамоа ҳужумининг асосий компонентларидан бирига айланди.

Мессининг жароҳат олиб сафдан чиққанидан кейин жамоани олға бошлайдиган футболчи Алба бўлди. У чап қанот ҳимоячиси, аммо ҳақиқий етакчилик хислатларини намойиш қилди. Ундаги иқтидор ва темперамент яққол кўзга ташланди.

«Интер»га қарши иккинчи муҳим голда айнан қанот ҳимоячисининг ҳужумга фаол тарзда қўшилиши ортидан содир бўлди. Кеча «Реал»га қарши дербида ҳам ҳужумдаги фаолликлари билан ажралиб турди. Унинг саъйи-ҳаракатлари Коутиньонинг дастлабки голни уришига олиб келди.

Суарес пеналти ишлаб олган вазият ҳам Албанинг ҳужумга қўшилиши ортидан юз берди. Иккинчи бўлимда ҳам ҳимояни унутмаган ҳолда ҳужумларга ўтиши каталонияликларга катта фойда берди.

1. Мўжизакор Марсело

Марсело «Реал» учун сўнгги уч ўйиндан бери гол уриб келмоқда. У ҳам бор йўғи чап қанот ҳимоячиси!

У номигагина чап қанот ҳимоячиси. Аслида бразилиялик ҳимоячи кўп вақтини ҳужумда ўтказадиган ва фойдали футболчи. У мадридликларнинг ҳам плеймейкери, ҳам сўнгги нуқтани қўя оладиган вакили ҳисобланади. «Барселона»га ҳам у ушбу вазифасини бажариб берди.

У Гарет Бейл ёки Карим Бенземадан кучлироқ ҳужумчи эмас албатта. Аммо ундаги ўзига бўлган ишонч барчасига қодир. Марсело 2-0 ҳисобини қисқартирганида жамоасига ишонч қайтарди. Унинг ҳотиржам тарзда Пикени алдаб гол уриши муҳим масала.

Бироқ Марсело учрашувни анча эрта якунлади. Унинг жароҳат олиб майдонни тарк этиши барча умидларни сўндирди.

1. Вальверде қилган хатоларидан хулоса чиқарди!

Ўтган мавсумда Вальверденинг «қора куни» Римда «Рома»га йирик 4-1 ҳисобида ютқазиб қўйгани бўлганди. Чемпионлар Лигасининг жавоб ўйинида катта устунликка эга бўлганига қарамай, у Дембелени захирага михлаб, ҳимоявий тактикани танлаганди.

Бу мавсумда ҳам у мана шундай хатоларни қилди. Бироқ ўша ўйинларда жамоа етакчилари Месси («Тоттенхем»га қарши) ва Алба («Интер»га қарши) унинг жонига оро кирганди. «Реал»га қарши эса у тўғри қарорларни қабул қилди. Вальверденинг Серхи Робертони ярим ҳимояга ўтказиши ва керак пайтда Дембелени «жангга ташлаши» ақлли қарорларидан бўлди.

Дембеле «Барса» қийналаётган вақтда жамоага тезлик берди, унинг тезкор ҳаракатлари ҳисоб 3-1 бўлишига олиб келди. Франциялик иқтидор эгасининг яап қанотдан жарима майдончасига ёриб кириши Артуро Видалнинг голи билан якунланди.

Эрнесто Вальверде Дембеленинг тезлигидан қурол сифатида фойдаланадими? Ёки у «Боруссия Дортмунд»нинг собиқ вакилини захирада қолдиришда давом этадими? Агарда у Дембелега имкон берса «Барса» жуда даҳшатли кучга айланиши муқаррарлиги ўз исботини топди.

1. «Адиос, Лопетеги»!

Хулен Лопетеги учун тўрт ой қўрқинчли, ваҳимали ойлар бўлди. У Испания термасини Жаҳон Чемпионати бошланишига саноқли кунлар қолганида ташлаб ноябрь ойи ҳам кирмасидан шармандали тарзда «Реал»дан кетиш учун шошиб келганмиди?

Лопетеги ёши ўтаётган таркибга янги қон бағишлаш ва шу тарзда муваффақиятларга эришишни ният қилганди. Натижада таркиб мотивацияни йўқотди ва тартибсизликлар бошланди.

Мессисиз қолган «Барселона»ни ютишнинг уддасидан чиқолмади. Бундай ҳолат охирги марта Рафа Бенитес даврида рўй берганди. У ўшанда кўп ўтмай Зиданга ўз жойини бўшатиб берганди. Мана энди таниш вазиятга Хулен Лопетеги тушиб қолди. Лопетегини жамоада ушлаб қолиш учун энди ҳеч қандай сабаб қолмади.