Каратэчиларимиз Малайзиядаги халқаро турнирда 19 та медални қўлга киритишди

Малайзиянинг Куала-Лумпур шаҳри каратэ бўйича 5-халқаро “KL MAYORS CUP 2018” мусобақасига мезбонлик қилди.

Унда Малайзия, Индонезия, Ўзбекистон, Непал, Ҳиндистон, Бангладеш ва Сингапур ва бошқа давлатлардан спортчилар ғолиблик учун кураш олиб боришди. Вакилларимиз бу турнирда 8 олтин, 7 кумуш ва 4 бронза медалларини қўлга киритиб, умумжамоа ҳисобида 3-ўринни эгаллашди. Биринчи ўрин жами 156 та медал жамғарган мезбон Малайзияга (35-47-74) насиб қилган бўлса, индонезиялик спортчилар 45 медал (22-8-15) билан иккинчи ўринни эгаллашди.

Медалларга тўхталадиган бўлсак, 8-9 ёшли спортчилар орасида Ҳасан Абдураҳмонов олтин, Асилбек Сагатов кумуш ва Шаҳрам Сувонов, Абдуллоҳ Жўраев ва Жонибек Давронов бронза медаллари билан тақдирланишди.

10-11 ёш (-30 кг) каратечилар ўртасида яккалик кумите баҳсларида Рустам Сувонов олтин, 12-13 ёш (+40 кг) яккалик кумите баҳсларида Дилшодбек Нуралиев ҳам олтин медални қўлга киритган бўлса, Мирсаид Чулибоев (+50 кг) кумуш медал билан кифояланди.

Шунингдек, +60 кг вазн тоифасининг яккалик кумите баҳсларида Жаҳонгир Насимов ҳам шоҳсупанинг энг юқори поғонасига кўтарилди.

10-13 ёшли ўғил болалар ўртасидаги жамоавий кумите баҳсларида вакилларимиз биттадан олтин ва кумуш медалларга сазовор бўлди. 18 ёшдан юқори ўғил болалар ўртасидаги жамоавий кумите баҳсларида вакилларимиз тенгсиз деб топилди. Олтин медал!

Қизлар ўртасидаги баҳсларда ҳам спортчиларимиз ажойиб натижаларга эришди.

8-9 ёшли қизлар ўртасидаги яккалик кумите беллашувларида Фарангиз Эшонқулова олтин, 10-11 ёшлилар орасида Гулираъно Жўраева (+40 кг) кумуш ва 12-13 ёшлилар ўртасида Ситора Авазова (+42 кг) ҳам кумуш медални қўлга киритди.

Шунингдек, ўсмирлар ўртасида Севара Жуманиёзова (+59 кг) яккалик кумите баҳсларида кумуш ва яккалик катада бронза медалига эга чиқди.

18 ёшдан кичик ва ундан катта қизлар ўртасидаги жамовий кумите баҳсларида вакилаларимиз иккита олтин медал билан тақдирланди.