«Ливерпуль»-«Бавария» Сарҳисоб (Эркин Ғайбуллаев блоги)
Ads

«Ливерпуль» ҳамда «Бавария» ўртасидаги Энфилддаги учрашувда ҳисоб очилмади.

«Бавария» ҳимоячилари Никлас Зюле ва Хуммелс «Ливерпуль» нинг ҳужум учлигига ҳимоя қандай бўлиши кераклигини кўрсатиб қўйишди. 

Ковачнинг тактикаси иш берди. У тўпни ярим ҳимоячилари назорат қилишини хоҳлади. Амалда шундай ҳам бўлди. Бу эса ўйиннинг майдон марказида бўлишини таъминлаб, Клопп жамоаси учун хавфли вазиятлар содир этишда қийинчиликларга олиб келди. «Ливерпуль» устози кейинги ой жавоб учрашувида анчагина тер тўкиши аниқ.

Бугунги ўйинда ёдда қолган 5 воқеани таҳлил қиламиз.

  1. «Бавария» эгиляпти, лекин синмаяпти!

«Бавария» клубини йиллар давомида кўп кузатганмиз. У хоҳ Клопп бўлсин, ёки Бенитеc Англияга ташриф буюриб, доим ўзини йўқотиб қўйган. Бу сафар ундай бўлмади. Амалдаги Германия чемпионлари ўз ўйинларини кўрсата олишди, футболчилар бир-бириларини сўзсиз тушуна олишди.

Ной​ер, Хуммельс​ ва Киммихлар ҳимояда бир бирига тўп узатишлари, ноқулай ва хавфли вазиятга тушиб қолишларини билсада, нореал босиқлик билан, ҳайиқмасдан тўп узатишди.

Тўпсиз ўйнашда ҳам Бундеслига чемпионлари худди мустаҳкам девордек ҳаракат қилишди. Улар Европанинг энг кучли ҳужум учлигига ўз жарима майдонларида ҳеч қандай имкониятлар қолдиришмади.

Мана шундай ишончли ўйин эвазига улар Англиядан 0:0 ҳисобидаги ўзлари учун яхши бўлган натижа билан қайтишди. Жавоб ўйинида биз бошқа «Бавария»ни кўришимизга шубҳа йўқ.

  1. «Ливерпуль»нинг«ғариб» ҳимояси бардошли чиқди.

Гнабри, Коман, Левандовски каби ҳужумчиларга қарши ван Дейксиз ўйнаши керак бўлганини билган «Ливерпуль» мухлислари ҳатто футболчи ва мураббийлари ҳам анчагина хавотир олишгани аниқ.

Фабиньо ўйиндан-ўйинга кучайиб бормоқда, аммо у ҳақиқий марказий ҳимоячи ўрни учун «яралмаган».Шундай вазиятда Матипнинг ишончли ўйини уни асосий «фигура»га айлантириб қўйиши мумкин.

Сешанба оқшомида бўлиб ўтган учрашувда, «Ливерпуль» ҳимоячилари ван Дейкни ўрнини билдиришмади. Улар Левандовскини тўпга уч мартадан кўпроқ тегишига қўйишмади, унинг ҳаракатларини бутунлай чеклаб, жарима майдонида якуний зарба ёки тўп узатишларни «кесиб» қўйишни уддалашди. Клопп бугунги ўйин учун ҳимоячилари билан фахрланса арзийди.

Энди Робертсон ва Трент Александер-Арнольд Команни «ёпиш»да анча тер тўкишди, Гнабри ҳам «Ливерпуль» қанот ҳимоячиларини жуда кўп синовдан ўтказди.

. «Қизиллар» ҳам ҳимоядаги ишончли ўйин сабаб немис чемпионларидан гол «қабул қилиб» олишмади. Жавоб учрашувида, меҳмонда урилган гол эвазига «Ливерпуль»да имкониятлар юқори бўлиши мумкин.

  1. «Бавария»да жавоб ўйини олдидан муаммо

Ҳеч ким биринчи бўлимда Киммихдан кўп дарвозага тўп тепмади (3) ва ҳеч ким ҳаводаги курашда ундан устунроқ ҳаракат қилмади. 24 ёшли футболчи Мане ёки Салoҳга «чақирув» ташлади.

Аммо немис ўйинчиси 27 дақиқада Мане ҳужумга ўтиб кетаётганда уни тўхтатиб қолиб, сариқ карточка билан жазолангани унинг ижобий ҳаракатига кичик «доғ» туширди.

Ажойиб ўйин намойиш этган Киммих кичик бир хатоси билан бу ўйинда жамоасига фойда келтиргандир, аммо Ковачни жавоб учрашуви олдидан «бош оғриғига» дучор қилди. Сабаби у мартда бўладиган жавоб учрашувини ўтказиб юборади, унинг ўрнига мураббийда ўнг қанот ҳимояси учун ягона танлов - Рафинья бўлади.

«Ажойиб учлик»ка қарши ўйиндан олдин, биттагина вариант билан қолган Ковач бундан хурсанд бўлмагани аниқ. Устига-устак ўша вазиятда Киммих вазиятга аралашмаса ҳам бўлар эди, сабаби Хави Мартинес ундан яқинроқда қаршиликка тайёр эди.

  1. «Ливерпуль» ўйинчисидан яна бир «спектакль»

Хендерсон ҳеч қачон ярим куч билан ўйнамайди. Англия термаси негадир унга тўғри баҳо бермайди. Кучига ишонишмайди. Мана бу ўйинда биз яна бир бор унинг нималарга қодирлигини кўрдик.

28 ёшли ўйинчига бугунги ўйин бўйича ҳеч кимда савол ва эътирозлар йўқ! У тўртта зарба йўлига чиқди, уч бора юқоридаги курашда ғолиб чиқди. Бугун қизил кийимдагилардан ҳеч қайсиси ундан ҳеч жабҳада устун келмади. Хендерсон 83 фоиз тўпни узатишда аниқлик кўрсатди, курашларда ва узатишлардан умумий 78 бора тўпни қабул қилиб олди.

Клопп жамоаси сардорининг тажрибаси ва ўйинни кўра олишига ишонади. Жавоб учрашувида ҳам унинг тажрибаси иш бериши шубҳасиз.

  1. Меҳмонга боришни ёқтирмайдиган инглизлар

«Ливерпуль» Чемпионлар Лигаси гуруҳ босқичида учта ўйинни ютқазганлигини ҳисобга оладиган бўлсак, Клопп ва унинг жамоаси  «Альянс-Арена» стадионида ғалаба қозониш учун 2 марта кўпроқ тер тўкишлари керак.

Афсуски, «қизиллар» «Бавария» учун ижобий бўлган нурсиз дуранг қайд этишди. Бундай натижада албатта немис клубининг ишончли ҳимоясининг ҳиссаси катта.

Дурангдан олдин жуфтликда «Ливерпуль»нинг имкониятини юқори баҳолаганлар, ўйиндан сўнг ўз фикрларини ўзгартиришларини айтишмоқда. Баъзилари ҳали ҳам «қизиллар»да имкониятнинг юқорилигини таъкидлашяпти.

«Бавария» ўз уйида анчагина хотиржам ва ишончли ўйнайди. «Ливерпуль» меҳмонда «довдираб» қолмоқда. Хуллас, Клоппнинг мақсади жиддий бўлса, у мана шу иккита одатни бузишига тўғри келади.