Маҳмуд Мурадов: Мейвезер ММАга лицензия олиш учун ариза топширмаган

Ўзбекистонлик спортчи Маҳмуд Мурадов бокс бўйича беш вазн тоифасининг собиқ чемпиони Флойд Мейвезернинг ММАга ўтиши борасидаги миш-мишлар ҳамон тинганича йўқ, бироқ у буларнинг барчаси ёлғон эканлигини маълум қилган.

Эслатиб ўтамиз, 2017 йил август ойида Лас-Вегасда бокс тарихидаги энг кассабоп жангларидан бири ташкил қилинган ва унда 40 ёшли Флойд Мейвезер (50-0-0, 27 KO) UFC чемпиони 29 ёшли ирландиялик Конор Макгрегорни (0-1-0) техник нокаут билан мағлуб қилган эди. Шундан бери ҳар икки спортчи атрофида аралаш яккакурашларда реванш жанг қилиш бўйича хабарлар чиқа бошлаган эди.

Мейвезерга қарашли “The Money Team” (TMT) клуби аъзоси Маҳмуд Мурадовнинг SPORTS.uz’га маълум қилишича, америкалик спортчи айни дамда ҳордиқ чиқариш билан банд.

– Буларнинг барчаси ёлғон. Ҳозирда биз биргамиз. Ҳамма унинг аралаш яккакураш жанг санъталари урушиш учун машғулотларга киришганлигини ёзмоқда. Унда бунга ҳаракат қилаётганини кўрганим йўқ. Майамида оилавий дам олмоқда. Тўғри, у шуғулланиш керак дейди, бироқ уларнинг барчаси шунчаки сўзлар холос. Бундан ташқари ҳеч қандай лицензия олишга уринаётгани йўқ. Фақатгина барчаси келажакда мумкин дейишдан нари ўтгани йўқ, – дейди Маҳмуд Мурадов.