«Мерси» Арсен Венгер!!!

«Тўпчилар» бош мураббийи «Арсенал»ни тарк этиши билан энг тўғри қарорни қабул қилди. Албатта унинг мероси унутилмайди ёки янгиланмайди. Goal нашри Лондон клубидан кетишини маълум қилган Арсен Венгер ҳақида мулоҳаза юритди.

2018-йил 20-апрел! Ушбу санани ва шахсни эслаб қолинг: Арсен Венгер ! 1996-йилда у клубга эндигина келганида британ нашрлари «Арсен ким?» дея бонг уришганди. Орадан 22 йил вақт ўтиб элзаслик мураббий мавсум якунида клубни тарк этишини маълум қилди.

Уч марта Премер Лига ва рекорд даражадаги Англия Кубоги совринлари (7 марта) соҳиби Венгер инглиз футболида ўчмас из қолдирди.

Кашфиётчи, ўқитувчи ва полиглот шимолий Лондонга Тьерри Анри ва Сеск Фабрегасларни олиб келди, ўзининг шахсий бренди – ҳужумкор футболни тақдим этди. Унинг фалсафасини «тўпчилар» мухлислари 2003-2004-йилги мавсумда гувоҳига айланишди. Ўшанда улар Премер Лигани мағлубиятсиз якунлаган эди.

«Арсенал» билан боғланган ҳар қандай киши икки ўн йиллик мобайнида ўз уйига айланиб қолган клубдан Венгернинг кетишини катта ҳаяжон билан қабул қилди.

Венгернинг «Арсенал»ини 90-йиллар охиридан бери кузатиб келадиган мухлис ёки журналист ҳеч шубҳасиз франциялик мутахассисни ягона деб билади.

«Ҳар бир мағлубият бу унутилмайдиган юракдаги доғдир», - дейди Венгер ўз интервьюсида. Унинг бошқарувидаги дастлабки ўн йил совринларга бўлган кучли иштиёқ билан кечди.

Сўнгги бир неча йилларда эса унинг клубдан кетишини ёқлаб ўтказилган намойишлар, онлайн чақириқлар ва танқидларга қарамай, Венгернинг энг катта танқидчилари ҳам айнан франциялик мутахассис даврида «Арсенал»нинг юзи ва ўйини жиддий тарзда яхшиланганини рад қила олмайди.

Шубҳасиз, Венгер Англияга келганидан бери жамият кўп ўзгаришларга юз тутди ва бу унинг омадли мураббий мақоми тушишига ҳам хизмат қилди. Англияга ўзининг инновацион услублари ва тактик ғоялари билан келадиган бошқа мураббийлар каби, Арсен Венгер ўзининг тамойилларига ўралашиб қолди ва уларни воқеъликка мослаштиришда қийинчиликка учради.

Ғоялар ва ишлар шамолдан ҳам тезроқ ўзгараётган бир пайтда, унинг муаммоси бу ўзгармас ёндашуви натижаси ҳисобланди. Барча яхши дамлар энди ўз якунига етди ва Арсен Венгернинг романтик асари келаси 50 йилда эсланиб юрилади.

Венгернинг келажаги борасидаги иккиланишлари ва директорлар кенгашининг босими туфайли у клубдаги 22 йиллик фаолиятига нуқта қўйди. Шартномасида яна бир йил бўлишига қарамай, бош мураббий ўз ихтиёрига кўра клубни тарк этишни афзал топди. Клуб ҳўжайинлари ҳам сўнгги йилларда парда ортида ўзгаришлар қилиш зарурлигини тушуниб етишди.

«Мен келажакда ҳам яшайман, - дейди Венгер ўз интервьюсида – бу режалаштирилган эди. Менинг вақтга бўлган муносабатим мутлақо қўрқинчли. Мен доимо кеч қолишдан қўрқаман. Тайёр бўлмасликдан қўрқаман.»

Венгер ниҳоят ўз ортига қараш имкониятига эга бўлди. Сўнгги икки ўн йилликда нималара эришганини сарҳисоб қилади. Унинг кетиши зарҳал ҳарфлар билан ёзилиши керак. Боиси унинг мероси хира тортмайди. У узоқ вақт хотирамизда яшаб қолади.

У ўзининг тамойиллари асосида янги авлодни тарбиялайдиган шахс сифатида унутилмайди. «Арсенал» мухлислари клуб қадриятларини эҳтиёт қилинг! Менинг муҳаббатим ва қўллаб-қувватлашим абадийдир!”

Эркинжон Ғайбуллаев тайёрлади.

 

Фикрлар

Фикр қолдириш учун авторизациядан ўтинг!