Мухтор Қурбонов: Энди жамоамизга нисбатан эътибор янада кучаяди

АГМК клубининг Ўзбекистон Кубогини қўлга киритгани муҳим воқелик бўлди. “Пахтакор” жамоасига финалда яққол фаворит сифатида қаралганди ва ғолиб чиқишига деярли шубҳа ҳам қолмаганди. Бироқ АГМК клуби “Пахтакор”ни мағлубиятга учратган ҳолда сенсация қайд этди. Стадионда жамоасининг муваффақияти бир четда кузатиб бурган АГМК клуби спорт директори Мухтор Қурбонов ўз фикрлари билан ўртоқлашди.

“Ҳар доим ҳам финалга чиқавермаймиз”

- Биласизми, ўтган йилдан жамоамизни юқори мақсадлар сари шакллантириш ишларини бошлагандик. Москвани ҳам бир кунда барпо этишмаган. Бу йил жамоанинг мавқеини кўтариш устида салмоқли ишлар амалга ошириляпти. Ниҳоят, АГМК тарихда биринчи марта Ўзбекистон Кубогини қўлга киритиб, қилаётган меҳнатларимиз бесамар эмаслигини кўрсатдик. Жамоамиз ўз номини тарихга ёздириб қўйди. “Пахтакор” кучли жамоа. Лекин футболчиларимиз улар каби кучли жамоа эканликларини исботлаш мақсадида бошқача тайёргарлик билан майдонга тушишди. Бу ҳолат уларнинг кўзларидан ҳам билиниб турганди. Бундан олдин “Бунёдкор”ни ҳам ютгандик. Айнан ушбу жамоаларга қарши ўйинларимизда жамоамиз ўзининг юқори даражасини кўрсата олди. Бизни хурсанд қилган томони, жамоамиз финалда ҳам ҳужумкор ўйин кўрсатишга ҳаракат қилди. Биринчи бўлимда пенальтидан гол уриб ҳисобни очганимиз ҳам бизга қўл келди. Боиси йигитларимизда ўзларига бўлган ишончи ортиб кетди. Шунингдек, омад ҳам ОКМК томонида бўлди. “Пахтакор”ни ҳам яхши ўйин кўрсатганини айтишим керак. Шунчаки, футболчиларимизни ўйинга жуда пухта тайёрлай олдик. Финалга ҳар доим ҳам чиқавермаймиз. Шунинг учун йигитларимиз ҳаммасини яхши тушуниб туришганди ва ўз номларини тарихга ёздириб қўйишди. Энди биз Осиё Чемпионлар лигасининг плей-офф босқичига тушдик. Биринчи навбатда Ўзбекистон шаънини муносиб ҳимоя қилишимиз керак. Энди жамоамиз яна бир поғона юқори савияга кўтарилди.

“Футболчиларимизда иштиёқ кучли эди”

- Ҳар бир аскар ҳам генерал бўлишни орзу қилади-ку. Гарчи чемпионатда кучли олтиликка кира олмаган бўлсак-да, аммо Кубок баҳслари биз учун омадли кечди. Қолаверса, футболчиларимиз айнан Кубок мусобақасида бошқача ўйин кўрсатишди. Ярим финалда “Бунёдкор” майдонида ғалаба қозонганимиз ва финалда ҳам ютганимиз сюрприз бўлиши мумкин. Лекин жамоамиздаги ҳамма вазиятни яхши тушуниб туришганди. Ҳар бир спортчи ҳам фаолияти давомида нимадир ютишни орзу қилади. Шу нуқтаи назардан олиб қараганда, футболчиларимизда Кубокни қўлга киритиш учун иштиёқ катта эди. Қолаверса, Олмалиқ кичкина шаҳарча бўлса-да, “Олмалиқ тоғ металлургия комбинати” корхонаси жамоани ҳар томонлама қўллаб-қувватлади ва бунинг эвазига жамоамиз Кубок соҳибига айланди.

“Бахтиёр Ашурматов билан шартномани узайтирамиз”

- Бахтиёр Ашурматовга ишонгандик ва у ишончимизни оқлаяпти. Бош мураббий сифатида ишга киришганидан бери жамоамизнинг ўйин сифати ҳам ўзгарди. Албатта, кейинги мавсум учун ҳам Ашурматов билан шартномани узайтирамиз. Биз бу мураббий билан янада янги чўққиларни забт этмоқчимиз. Келаси йили чемпионлик учун курашадиган жамоани шакллантириш ва ўз навбатида Осиё Чемпионлар лигаси плей-офф босқичидан муваффақиятли ўишни ҳам мақсад қилиб қўямиз. Ашурматов ўзи учун ҳам мураббий сифатида бир поғонада олдинга қадам ташлади. У ўйинчилик пайтида ҳам Кубокни қўлга киритганди. Энди эса Бахтиёр энг ёш мураббийлардан бири сифатида Кубок соҳибига айлангани ҳам эътиборга молик бўлди. Ҳали ҳаммаси олдинда деб умид қиламан ва Ашурматовга бундан кўпроқ муваффақиятлар ҳамрох бўлишини тилайман.

“Раҳбарият футболчиларни муносиб тарзда рағбатлантиради”

- Кубокда қўлга киритилган ғалаба тўғрисида ҳали раҳбарият билан гаплашмадик. Аммо бемалол айта оламанки, бу масала бўйича ҳаммаси жойида бўлади. Жамоа аъзоларига катта миннатдорчилик билдирган ҳолда уларни муносиб равишда рағбатлантиришади. Бу борада раҳбарият қараб турмайди. Энг керакли жиҳати бу эътибор. Энди аниқки, жамоамизга нисбатан эътибор янада кучаяди.

“Финалдаги ғалабадан кейин қаттиқ ҳаяжонда эдим”

- Тан олиш керакки, жамоамизнинг финалда ғалаба қозонгани кутилмаган сюрприз бўлди. Шу боис қаттиқ ҳаяжонда эдим. Натижада раҳбар сифатида жамоамизнинг ғалабани қай тариқа нишонлаётганини четдан туриб кузатиб турдим. Футболчилик пайтида бошқача бўларди, аммо раҳбар сифатида янада бошқача бўлар экан. Ечиниш хонасида ҳар бир футболчини бирма-бир табриклаб чиқдим. Очиғи, хурсандчилигимни қай тариқа ўтказганимни ўзим биламан. Буни оддий сўз билан таърифлаб бера олмайман. Бошқача ҳиссиётлар оғушида қолгандим. Жамоамиз ниҳоят Осиё Чемпионлар лигасида қатнашади. Бир томондан қараганда бундай муваффақиятга эришганимизга ишонмадим ҳам. Аммо иккинчи томондан хурсандлигимдан ўзимни қўярга жой топа олмадим.

“ОЧЛда муносиб иштирок этиш учун таркиб кучайтирилади”

- Албатта жамоамизни янада кучайтирамиз. Керак бўлса, савияси кучлироқ бўлган футболчиларни таклиф қиламиз. Ҳозирги легионерларимиз ҳам ёмон эмас. Лекин барибир чемпионлар лигаси – бу бошқа савия. Раҳбарият ва мураббийлар билан келишган ҳолда жамоамизни янада шакллантириш юзасидан режалар тузиб оламиз. Юқорида айтганимдек, ОЧЛда муносиб иштирок этишдан ташқари биз келаси мавсумда чемпионлик учун ҳам курашишни ўз олдимизга мақсад қилиб қўймоқчимиз.

Шуҳратбек Жўраев суҳбатлашди.