"Навбаҳор" ўзининг Қаршидаги қора анъанасига чек қўйди

Кеча Pepsi Суперлигасида 16-тур ўйинлари старт олди. Қаршининг "Насаф" клуби ўз майдонида Наманганнинг "Навбаҳор" клубини қабул қилди.

Қизиқарли ва томошабоп тарзда кечган ўйинда кучлар тенг келди - 1:1. Шу тариқа, "лочинлар"нинг Қаршидаги мағлубиятли серияси барҳам топди.

Гап шундаки, "Навбаҳор" 2012 йилдан буён илк бор "Насаф" майдонидан очко билан қайтди. Жумладан ўтган мавсум Қаршида кечган ўйинда Рўзиқул Бердиев шогирдлари 4:0 ҳисобида ғалаба қозонган эдилар.

Умуман, мазкур жамоаларнинг кечаги ўйини ушбу қарама-қаршиликда Қарши   шаҳрида ўтган 23-ўйин бўлди. Ўтказилган беллашувларнинг 18 тасида "аждарлар", 3 тасида "лочинлар" ғалаба қилган бўлсалар, қолган икки ўйинда дуранг натижа қайд этилган.