Осиё Кубоги-2019даги Ўзбекистон МТЖнинг иштироки, мураббийлар истеъфоси ва
Ads

Хабарингиз бор, сайтимиз томонидан “Ҳафта воқеликлари” дея номланган лойиҳани тақдим этиб келмоқдамиз. Сиз унда ўзбек, Осиё ва жаҳон футболида содир бўлган ҳафтанинг энг муҳим воқеликлари билан танишишингиз мумкин.

Дастлаб ўзбек футболи ҳақида.

Хабарингиз бор, айни пайтда БААда навбатдаги Осиё Кубоги мусобақаси бўлиб ўтмоқда. Ўзбекистон МТЖ илк турда қийин аммо муҳим 3 очкони қўлга киритди. Эктор Купернинг футболчи алмаштиришдаги топқирлиги ғалабанинг калити бўлди

Ўзбекистон миллий терма жамоаси илк учрашувда Уммон билан куч синашди.

Баҳсдан аввал кўпчилик Эктор Купер шогирдларидан нимани кутишни билмаётганди. Гарчи терма жамоамизга мухлислик қилсакда, ўйинда ютқазиб қўймасмикинмиз деган ҳадик ҳам йўқ эмасди. Бунга бир қанча сабаблар бор.

Биринчидан: Чемпионат кутилмаган натижалар билан бошланди. Ҳар қандай оддий рақиб кучлиларга муаммолар пайдо қилди ва ҳатто айримлари зафар қучди. Мисол учун Австралиянинг Иордания томонидан таслим этилиши.

Иккинчидан: сал кам 50 кундан бери ўртоқлик ўйини ўтказилмади. Осиё Кубоги-2019га тайёргарлик кўриш жараёнининг охирги йиғинида назорат баҳсида майдонга тушмаган ягона жамоа бу – Ўзбекистон бўлди.

Умуман олганда, аввалги ўртоқлик беллашувларида ҳам ижобий натижалар қайд этмагандик. Фақатгина кучсиз жамоаларни ютганимизни инобатга олмаса, албатта. Шунинг учун кўпчилик тактикани танқид қилди.

БААдаги мусобақада Эктор Купер танқидларга жавоб берадиган пайт келди. Ҳар қандай кучли мураббий 4-5 ой ичида жамоада ўзгаришлар қилиши лозим. Шунинг учун ҳам биз қитъа турнирида нималар кутишимизни билмай юргандик.

Ўйиндан аввал мусобақа ташкилий қўмитаси мутасаддиси миллий терма жамоамиз дарвозабони Игнатий Нестеровни 5-Осиё Кубогидаги иштироки билан табриклади. Дарвозабонимиз 5 та Осиё Кубогида иштирок этган ягона футболчига айланди. У 2004, 2007, 2011 ва 2015 йиллардаги қитъа биринчиликларида ўйнаган.

Учрашувни уммонликлар катта устунлик билан бошлашди. Дарвозамиз томон бир нечта хавфли вазиятлар яратишди. Игнатий Нестеров шу куни бизни мағлубиятдан қутқариб қолди. Ўзбекистоннинг бу мавсумдаги энг яхши дарвозабони Осиё Кубогига олиб кетилмади деб, Нестеровнинг тажрибасига шубҳа қилганлар уялиб қолишди. Игнатнинг ажойиб сейвлари муқаррар голлардан сақлади.

Ҳужумни рақиб қилди, голни биз урдик. Марат Бикмаев жарима майдони яқинида йиқитилди. Жарима зарбасини Одил Аҳмедов амалга оширди. Жамоамиз сардори чамаси 20 метр узоқликдан тўпни ажойиб тарзда дарвозага киритди. Ушбу муваффақият терма жамоамиз тарихидаги 450-гол сифатида тарихга кирди.

Уммон яна олдинга чоғланди. Уларнинг уруниши 72-дақиқада самара берди. Чап қанотдан ташкил этилган ҳужумни Муҳсин Ал Гассани ижобий якунлади. Бу ўтказиб юборилган тўп термамиз тарихида 300-гол сифатида ёдда қолди.

Ҳисоб тенглашгач, Эктор Купер иккита ўзгаришни амалга оширди. Жалолиддин Машарипов ва Марат Бикмаев ўрнига захирадан Икромжон Алибоев ва Элдор Шомуродов майдонга тушди. Айнан шу футболчилар ўйин тақдирини ҳал қилишди. 86-дақиқада Алибоевнинг пасидан Шомуродов самарали фойдаланиб, дарвозанинг яқин бурчагини ишғол қилди.

Ҳакам томонидан қўшиб берилган дақиқада Егор Кримец ўзидан узоқлашиб кетаётган рақиб футболчисини ушлаб қолди ва майдондан четлатилди. Қолган вақт мобайнида сондаги устунликдан уммонликлар фойдалана олишмади. 

Шу тариқа, қийин кечган ўйинда ҳамюртларимиз муҳим уч очкони қўлга киритишди.

Қатарнинг «BeInSport» телеканали Ўзбекистон – Уммон учрашуви ҳакамлари ишини таҳлил қилиб, шундай хулосага келди: Ўзбекистон дарвозасига иккита пенальти белгиланмади, аммо Уммоннинг голи “офсайд”дан киритилди.

Уммон матбуоти Ўзбекистон билан баҳс натижасидан қониқмаган бўлса-да, Пим Вербек жамоаси ўйинини яхши баҳолаган.

 

БААдаги чемпионатнинг иккинчи тур учрашувлари ҳам старт олган. Ҳўш, биринчи тур ўйинлари бизга нималарни тақдим этди?

Хабарингиз бор, айни кунларда Бирлашган Араб Амирликларида навбатдаги Осиё Кубоги мусобақасининг иккинчи тур ўйинлари ўтказилмоқда. Биз ортда қолган дастлабки тур ўйинларининг қисқача баёнини тақдим этамиз. 

Турнирнинг очилиш куни мезбонлар Баҳрайн билан куч синашишди. Учрашувдан олдин кўпчилик икки хил тахмин билдирди. Айримлар мезбон жамоа - БАА босимда ўйнайди ва бу унга панд бериши мумкинлигини, баъзилар эса осон ғалаба қозонишини айтишганди. Шу куни биринчи тахминчиларнинг фикрлари тўғри чиқди. Чунки БААнинг олтин авлоди дея аталаётган таркиб сал қолса, Баҳрайнга имкониятни бой бериши мумкин эди. Иорданиялик ҳакам уларнинг бахтига меҳмонлар дарвозаси томон пенальти белгилади. Захирадан майдонга тушган Аҳмад Ҳалил 11 метрли жарима зарбасидан самарали фойдаланиб, мухлислари қаршисида жамоасини уялиб қолмаслигини таъминлади.

Иккинчи куни Ҳиндистон барчани ажаблантирди. Таиландга қарши баҳсда ҳиндлар ажойиб ўйин намойиш этиб, йирик ҳисобдаги ғалабани тантана қилишди. Мағлубиятга чидай олмаган Таиланд футболи раҳбарлари жамоа бош мураббийини истеъфога чиқаришди.

Мусобақанинг иккинчи куни ҳам сенсациялардан ҳоли ўтмади. Соврин учун асосий фаворит саналган Австралия 26-дақиқада киритилган голга жавоб беролмади. Натижада, “яшил қитъа” вакиллари стартни мағлубият билан қарши олишди.

Сурия – Фаластин учрашувида ҳисоб очилмади. Ўйинни ҳамюртимиз ФИФА рефериси Равшан Эрматов бошқариб борди. Эътиборлиси, Осиё Кубоги-2019даги дастлабки қизил карточка айнан Эрматов томонидан кўрсатилди.

Фаластин терма жамоаси Осиё Кубогида биринчи марта “қуруқ” ўйин ўтказди. Улар 2015 йилги Австралиядаги қитъа чемпионатида жами 11 маротаба гол қўйиб юборишганди. Шунингдек, фаластинликлар ўзларининг ноҳуш анъанасига «содиқ» қолган ҳолда, кетма-кет иккинчи бор Осиё Кубогининг дастлабки учрашувида қизил карточка билан «сийланди». 2015 йилда Фаластин вакили Аҳмед Маҳажна гуруҳ босқичининг илк учрашувида майдонни эрта тарк этганди.

Сурия терма жамоаси шу пайтга қадар ўтказилган Осиё чемпионатларида биринчи бор дуранг натижа қайд этди (14 ўйин, 5 ғалаба, 8 мағлубият). Улар сўнгги бор, 1984 йили Қатар билан 1:1 ҳисобидаги дурангга имзо чекишганди.

Хитой – Қирғизистон ўйинида ҳам сал қолса, сенсация кузатилиши мумкин эди. Лекин Қирғизистон дарвозабонининг қўпол хатоси футболчиларнинг кайфиятига ёмон таъсир қилди. Якунда хитойликлар зафар қучишди.

Эътиборли томони шундаки, тарихда илк бор Осиё Кубогида иштирок этаётган Қирғизистон терма жамоаси ўзининг биринчи голини урди. Дарвозани ишғол қилган Аҳлиддин Исроилов айни пайтда бирор бир клубда фаолият юритмайди. Унинг сўнгги клуби Индонезиянинг "ПСИС Семаранг" жамоаси эди. Қирғизистонликлар Осиё Кубоги тарихида дарвоза томон йўллаган илк зарбасини голга айлантира олган биринчи жамоа бўлишди.

Хитойликлар охирги 4 та Осиё Кубогида гуруҳ босқич баҳсларини ғалаба билан бошлашган. Сўнгги бор, улар 1996 йилги қитъа биринчилигининг илк ўйинида мағлубиятга учрашган. Ўшанда улар Ўзбекистон терма жамоасига имкониятни бой беришганди.

Жанубий Корея ўртоқлик учрашувларидаги шижоатни кўрсата олмади ёки кўрсатгиси келмади. Паулу Бенту шогирдлари Ўзбекистонга қарши баҳсдаги ўйинини кўпчилик эсидан чиқармаган бўлса керак.

Етакчилар борасида гап кетганда, Эрон ўз номига яраша “иш қилди”. Карлуш Кейруш шогирдлари рақибини “аяб” ўтирмади. Фақатгина Эрон фаворитлар қандай ҳисобда ғалаба қозониши кераклигини кўрсатиб қўйди.

Вьетнам Ироқ билан баҳсда тенг ўйин кўрсатди. Икки бор ҳисобда олдинда борди. Аммо голларга бой учрашувда ироқликлар уч очкони қўлга киритишди.

Мусобақанинг уч карра ғолиби - Саудия Арабистони терма жамоаси илк турда КХДРга қарши баҳс олиб борди ва рақиблари дарвозасига жавобсиз 4 та тўп киритди. Шу тариқа, Шимолий кореяликларнинг Осиё Кубокларидаги ғалабасиз серияси давом этди. КХДР термаси қитъа биринчилигида қаторасига 12-ўйиндирки, ғалаба нима эканлигини билмай келмоқда. Улар охирги марта 1980 йил Қувайтда ўтган Осиё Кубогининг гуруҳ босқичи доирасида Яманни 2:1 ҳисобида мағлуб этишнинг уддасидан чиқишганди.

Ливан Қатарга қарши учрашувда 65 дақиқа тура олди холос. Ундан кейин қатарликлар маҳорат эвазига дарвозани икки бор ишғол қилишди ва биринчи турда ғалаба қозонганлар қаторидан ўрин эгаллашди.

Япония илк турда осон ғалабага эришишини ўйлаган бўлса, ажаб эмас. Аммо Туркманистон терма жамоаси уларга етарлича қаршилик кўрсатди. Хатто туркманлар биринчи бўлиб дарвозани ишғол қилишди. “Бухоро” клуби шарафини ҳимоя қилган Арслонмурот Омонов ажойиб зарбаси борлигини яна бир бор намойиш этди. Араб экспертлари Омонов зарба берган тўпнинг тезлиги 113 км/соатни ташкил этганини маълум қилишди. Бироқ учрашувда тўрт карра Осиё чемпионлари ғалаба қозонишди.

Биринчи турнинг охирги ўйини биз учун ижобий ҳотима топди. Ўзбекистон миллий терма жамоаси гуруҳдаги асосий рақибини таслим этди. Одил Аҳмедовнинг бурама зарбаси ва Эктор Купернинг ўйинчи алмаштиришдаги топқирлиги ғалабамиз омили бўлди.

1-тур

“А” гуруҳи

БАА – БАҲРАЙН 1:1

Голлар: Ҳалил пенальти 88 – Ал Ромайхи 78

ТАИЛАНД – ҲИНДИСТОН 1:4

Голлар: Дангда 33 – Четри пенальти 27, 46, Тапа 69, Лалпекхлуа 81

“В” гуруҳи

АВСТРАЛИЯ – ИОРДАНИЯ 0:1

Гол: Бани Яссин 26

СУРИЯ – ФАЛАСТИН 0:0

"С" гуруҳи

ХИТОЙ – ҚИРҒИЗИСТОН 2:1

Голлар: Матяш автогол 50, Дабао 78 – Исроилов 42

ЖАНУБИЙ – ФИЛИППИН 1:0

Гол: Хван 67

"D" гуруҳи

ЭРОН – ЯМАН 5:0

Голлар: Тареми 12, 25, Дежага 23, Азмун 53, Годдос 78

ИРОҚ – ВЬЕТНАМ 3:2

Голлар: Али 35, Тарик 60, Аднан 90 – Фаёз автогол 24, Нгуен 42

"E" гуруҳи

САУДИЯ АРАБИСТОНИ – КХДР 4:0

Голлар: Бахебри 28, Ал Фатиль 27, Ал Давсари 70, Ал Муваллад 87

ҚАТАР – ЛИВАН 2:0

Голлар: Ал Рави 65, Али 79

"F" гуруҳи

ЯПОНИЯ – ТУРКМАНИСТОН 3:2

Голлар: Осако 56, 60, Доан 71 – Омонов 27, Атаев пенальти 79

ЎЗБЕКИСТОН – УММОН 2:1

Голлар: Ахмедов 34, Шомуродов 86 – Ал Гассани 72

 

Биринчи турда Таиланд, иккинчи турда Сурия терма жамоаси устози ўз лавозимини тарк этди. Ҳали Осиё Кубоклари тарихида дастлабки 5 кунда иккита истеъфо кузатилмаган эди.

Осиё Кубогининг 1-турида Таиланд терма жамоаси кутилмаганда Ҳиндистондан йирик ҳисобда мағлубиятга учради.

Жамоа ўзидан нисбатан кучсиз ҳисобланган Ҳиндистон билан кечган беллашувда 1:4 ҳисобида имкониятни бой берди. Натижада, Таиланд футбол федерацияси терма жамоа устози Милован Райевацни ўз лавозимидан озод этди. Таиланд футбол федерацияси раҳбарияти ҳиндлардан қабул қилиб олинган мағлубиятни ҳазм қила олмади. Шу тариқа, навбатдаги Осиё Кубогининг дастлабки туридаёқ истеъфо кузатилди.

Маълумот учун, сербиялик мутахассис яқинда терма жамоада иш бошлаганди. Аслида-ку, ўтган ой жамоа АФФ Кубоги ярим финалида Малайзияга ютқазиб қўйганидан сўнг раҳбарият бу мураббий ишидан ташвишга тушганди. Ҳиндистонга бой берилган ўйин эса ҳаммасидан ошиб тушди. Натижада, мураббийга чиқиш эшиклари кўрсатилди. Энди жамоани вақтинча маҳаллий мураббий бошқармоқда.

Иккинчи турда Сурия терма жамоаси бош мураббийи Бернд Штанге истэъфога чиқарилди. Бунга сабаб Суриянинг Осиё кубогидаги муваффақиятсиз иштироки бўлди. Мусобақани Фаластин (0:0) билан дуранг ўйнаган ҳолда бошлаган Штанге шогирдлари, иккинчи турда Иорданияга (0:2) имкониятни бой беришди. Сурия энди 3-турда Австралия имтиҳонидан ўтишига тўғри келади. Буни уддалаш қанчалик осон ёки қийинлигини ўйиндан сўнг билиб оламиз. Осиё Кубоклари тарихида дастлабки 5 кунда иккита истеъфо кузатилмаган эди.

 

“Бунёдкор”да ўзгаришлар мавсуми. Бир неча кун олдин клубда бош директор алмашганди. Жамоага бош мураббий ҳам тайинланди. Энди “қалдирғочлар”га Вадим Абрамов устозлик қиладиган бўлди

Тошкентнинг “Бунёдкор” футбол клуби раҳбариятида ўзгаришлар амалга оширилди. “Бунёдкор” ФК бош директори сифатида 2017 йилнинг май ойидан буён фаолият юритиб келган Мурод Алиев ўз хоҳишига кўра, лавозимидан озод этилди. Клубга бош директор вазифасини бажарувчи этиб бугунги кунга қадар “Бунёдкор” клуби спорт директори сифатида ишлаган Улуғбек Мирзаев тайинланганди.

Орадан бир неча кун ўтиб, футболчилар ва мураббийлар билан клуб раҳбарияти йиғилиш ўтказди.

Йиғилишда бир қатор масалалар муҳокама этилди. Янги мавсумда жамоа олдига қўйилган вазифалар, бажарилиши лозим бўлган ишлар, режалар билан таништирилгач кун тартибидаги асосий масала – бош мураббий масаласи кўриб чиқилди. Клуб бош директори Улуғбек Мирзаев вақтинча бош мураббий вазифасини бажариб турганлиги учун Шуҳрат Мақсудовга миннатдорчилик билдирди ҳамда клубнинг бош мураббийи этиб Вадим Абрамов тайинланганини маълум қилди.

Вадим Абрамовга мураббийлар штабида Марат Мифтахутдинов ёрдамлашади. Бош мураббий билан биргаликда клуб мураббийлар штаби масаласи тез орада кўриб чиқилади.

«SPORTS.uz» сайтида чоп этилган материаллардан нусха кўчириш, тарқатиш ва бошқа шаклларда фойдаланиш фақат таҳририят ёзма розилиги билан амалга оширилиши мумкин.

ТАҲРИРИЯТ ҲАҚИДА

Гувоҳнома: №1002. Муассис: «RENDER SYSTEMS» МЧЖ.

Таҳририят манзили: 100047, Тошкент шаҳри, Истиқбол кўчаси, 15-уй.
Электрон манзил: info@sports.uz.
Телефон: +998 71 233-78-98