Максим Шацких: "Умид қиламанки, эртага Машариповнинг куни бўлмайди"

Хабарингиз бор, эртага "Пахтакор" Элит Чемпионлар лигаси 5-тури доирасида "Истиқлол" билан ўйнайди. Учрашувдан аввал "шерлар" бош мураббийи Максим Шацких ва ҳимоячи Ҳожиакбар Алижонов матбуот анжуманида иштирок этди.

"Истиқлол"ни ўрганиш ва тайёргарликка кўп вақтимиз бўлмади, лекин имкон қадар рақибни таҳлил қилдик. Ўйин иккала жамоа учун ҳам жуда муҳим саналади. Ҳар бир очконинг қадри катта. Биз яхши ўйин кўрсатган ҳолда ижобий натижа қайд этишга интиламиз.

Рақиб сафида деярли барча ҳужумларни Машарипов ташкил қилаётганини айтган бўлардим. Умид қиламанки, эртага унинг куни бўлмайди ва биз уни тўхтата оламиз. Беллашувда режаларимизни ишга солиб, керакли натижага эришишга ҳаракат қиламиз", - деди Шацких.

"Эртанги баҳс ҳар икки жамоа учун жуда муҳим ва ғалабанинг аҳамияти юқори. Биз бор кучимизни бериб, уйга ғалаба билан қайтиш ва ишқибозларимизни хурсанд этишга уринамиз", - деди Ҳожиакбар Алижонов.