Ўзбек клублари тарихидан – “Насаф”

“Насаф” футбол клуби 1986 йилда Қарши шаҳрида ташкил этилган. 1997 йилдан буён Ўзбекистон Олий лигасининг доимий қатнашчиси.

Ўша мавсумда “Насаф” олтинчи ўринни эгаллаган. 2000 йилда эса жамоа илк марта бронза медалига эга чиқди. Шундан сўнг яна 9 марта Ўзбекистон чемпионати финишига жамоа 3-бўлиб келди.

“Насаф” жамоаси қитъамиз миқиёсида халқаро майдонда ғалабага эришган ягона ўзбек клуби бўлиб турибди. 2011 йил жамоа тарихидаги энг эсда қоларли мавсум сифатида ёдда қоладиган бўлди. Мавсум аввалида таркибга бир қатор тажрибали ва иқтидорли футболчиларни жалб этган қаршиликлар бир йўла учта мусобақа – Осиё футбол конфедерацияси кубоги, Ўзбекистон чемпионати ва кубоги беллашувларида муваффақиятли қатнашишди. Украиналик таниқли мутахассис Анатолий Демяненко қўл остида қаршилик футболчилар 2011 йили Осиё Футбол Конфедерацияси кубогини қўлга киритишди.

Ортда қолган мавсумда “Насаф” клуби Суперлигада 7-поғонани банд этди.

“Насаф” жамоаси эришган натижалари:

ОФК Кубоги соҳиби (2011)

2 карра Ўзбекистон чемпиони вице-чемпиони (2011, 2017)

10 карра Ўзбекистон чемпионати бронза медали соҳиби (2000, 2001, 2005, 2006, 2009, 2010, 2013-2016)

Ўзбекистон Кубоги соҳиби (2015)

Ўзбекистон Суперкубоги соҳиби (2016)

Осиё Чемпионлар Кубоги ярим финалчиси (2001/02)
2 карра ОФК “Fair play” соврини соҳиби (2002, 2011)

Жамоада тўп сурган машҳур футболчилар: Рўзиқул Бердиев; Ботир Қораев; Нўъмон Хасанов; Александр Хвостунов; Владимир Шишелов; Шуҳрат Мамажонов; Каха Гоголадзе; Артур Геворкян; Сергей Крот; Дмитрий Козаченко; Андрей Переплёткин; Иван Бошкович; Боян Малишич; Александр Петрович.

Жамоани бошқарган машҳур мураббийлар: Виктор Борисов; Виктор Макаров; Баҳром Ҳакимов; Владимир Фомичёв; Виктор Кумиков; Анатолий Демьяненко; Рўзиқул Бердиев.

Манба: ЎзПФЛ