Ўзбекистон термасининг бекор қилинган ўртоқлик ўйинлари

Ўзбекистон миллий терма жамоасининг 12 февраль куни Анталия шаҳрида Арманистон терма жамоасига қарши ўтказилиши режалаштирилган ўйин бекор қилинганидан хабарингиз бор. Бу ҳолат сўнгги йилларда бир неча бор қайтарилаётгани сабаб, ушбу янгилик жамоатчилик томонидан кескин танқидларга учради. Биз эса айнан сўнгги йилларда термамизнинг бекор қилинган ўртоқлик ўйинларини эслашга ҳаракат қилиб кўрамиз.

Темурхўжа Абдухолиқовнинг янги жамоаси ҳақида нималарни биласиз?

Ўзбекистон – Туркия

Бўлиб ўтиши лозим бўлган сана ва жой: 14.08.2013 Тошкент

Бундан салкам 4 йил муқаддам потенциал имконияти анча юқори бўлган Туркия термасининг “Пахтакор” стадионида Ўзбекистон термасига қарши ўйин ўтказиши борасида келишиб олинган эди. Бироқ белгиланган вақтга 9 кун қолганида Туркия Футбол Федерацияси(ТФФ) расмий сайтида ушбу баҳснинг бекор қилингани тўғрисида хабар чиқади. Ўшанда бўлиши кўзда тутилган мазкур ўйин Ўзбекистон ташаббуси билан бекор қилингани тўғрисида хабар тарқатилган эди.

Ўзбекистон – Молдова

Бўлиб ўтиши лозим бўлган сана ва жой: 09.02.2016 Анталия(Туркия)

Бундан роса бир йил олдин Самвел Бабаян жамоаси Туркиядаги йиғин доирасида Молдова терма жамоасига қарши ўртоқлик ўйини ўтказиши лозим эди. 2015 йилнинг 25 ноябрь санасида ЎФФ расмий сайтида айнан шу тўғрисида хабар чиққан эди. Ушбу ўйин ўтказилмаслиги тўғрисидаги янгиликдан сўнг, бизникилар хавфсизлик масалалари сабаб Туркия йиғини ва унда ўтиши кўзда тутилган ўйинлар бекор қилингани тўгрисида баёнот беришган.

Ўзбекистон – Қирғизистон

Бўлиб ўтиши лозим бўлган сана ва жой: 02.06.2016 Тошкент

Канадага қарши ўйин олдидан Тошкентда Қирғизистон билан “репетиция” ўтказишимиз кўзда тутилган эди. Бироқ мазкур ўйин ҳам бекор қилинган. Аввало ушбу вариант қирғизлар Яман билан ўйин ўтказмасликлари аниқ бўлгач пайдо бўлган эди. Алал-оқибат бу вариант ҳам бекор бўлади ва…

Ўзбекистон – Экваториал Гвинея

Бўлиб ўтиши лозим бўлган сана ва жой: 02.06.2016 Тошкент

Одатда, “биринчи хато иккинчисини бошлаб келади”, деган гапни кўп эшитамиз. Ушбу ҳолат ҳам мазкур нақлга мос келади. Аввалига Қирғизистон билан ўйин бекор қилингач, Экваториал Гвинея билан “келишилди”. Бироқ африкаликларнинг ташаббуси билан мазкур беллашув ҳам бекор қилинди. Бунга сабаб сифатида эса гвинеяликлар 3 июнь куни Африка Миллатлар кубогининг саралашида Бенин билан ўйнаши мумкинлиги келтирилган эди. Бизникилар эса вазиятдан чиқиб кетишнинг “ғайриоддий” усулини кўрсатишгани кўпчиликнинг ёдидан кўтарилмаган бўлса керак.

Ўзбекистон – “Яблонец”(Чехия)

Бўлиб ўтиши лозим бўлган сана ва жой: 13.07.2016 Энбаҳ(Австрия)

Ёзнинг қоқ ўртасида ташкил этилган Австрия йиғинидан ўрин олган ушбу ўйин об-ҳавонинг “инжиқ” келгани туфайли ўтказилмаган эди. Яъни, бир сўз билан айтганда , ёмғир ёғиб, кечга довул тинмагани туфайли ҳар икки томон келишиб, “бор-э”, деб ўйинни бекор қилиб қўя қолишган. Ана шунақа.

Ўзбекистон – Арманистон

Бўлиб ўтиши лозим бўлган сана ва жой: 12.02.2017 Анталия(Туркия)

Ушбу ўйин миллий терма жамоанинг 9–13 февраль кунлари Туркияда ташкил қилинадиган ўқув-машғулот йиғинлари доирасида ўтказилиши кўзда тутилган эди. Арманистон термаси Туркиядаги сиёсий барқарорсизлик туфайли у ерда йиғин ўтказишдан бош тортди ва юзага келган ноқулайлик учун Ўзбекистон футбол федерациясидан узр сўради.

Сервер Жепаровнинг янги жамоаси ҳақида нималарни биласиз?

Шаҳзод Холбоев тайёрлади