Қашқадарё болалар ва ўсмирлар футбол академиясида китобхонлик тадбири ўтказилди

Ўзбекистон Республикаси Президенти Шавкат Мирзиёевнинг “Китоб маҳсулотларини ривожлантириш, китоб мутолааси ва китобхонлик маданиятини ошириш ҳамда тарғиб қилиш бўйича комплекс тадбирлар тўғрисида “ги қарорида белгилаб берилган вазифалар ижросини таминлаш мақсадида Қашқадарё футбол академиясининг анжуманлар залида китобхонлик кечаси ташкил этилди. Тадбирда ўқувчилар, мураббийлар, шоир ва ёзувчилар, ОАВ вакиллари иштирок этишди.

 

Китобхонлик тадбирида Ўзбекистон Ёзувчилар уюшмасининг Қашқадарё вилоят бўлими раҳбари, шоир Ўроз Ҳайдар, Ўзбекистон ёзувчилар уюшмаси аъзоси, “Шуҳрат” медали соҳиби, шоира Нилуфар Умарова ҳамда ёш ва умидли ёзувчи Нафиса Давронлар ўз ижод намуналари билан меҳмонларни хурсанд этишди.

 

Китобхонлик анжуманига ташриф буюрган меҳмонлар китобнинг инсон маънавияти юксалишидаги беқиёс ўрни ҳақида таъкидлаб ўтилди.  Шунингдек,  академия тарбияланувчилари ҳам  юртни тараннум этиш ва бошқа эзгу-мақсадларга эврилган  мавзуларда ўқиган ва ёд олган шеър ва ҳикоялардан айтиб беришди. Тадбир сўнггида эса Ўзбекистон Ёзувчилар уюшмаси Қашқадарё вилоят бўлими томонидан футбол академияси тарбияланувчилари учун китоблар совға қилинди.