“Реал” Куртуа борасида “Челси” билан келишувга эришди

Лондоннинг “Челси” клуби дарвозабони Тибо Куртуа тез орада “Реал”га кўчиб ўтиши мумкин. Бу ҳақда RMC Sport нашри хабар тарқатмоқда.

Юқоридаги манбаанинг маълум қилишича “қироллик клуби” 26 ёшли бельгиялик посбон учун “аристократлар”га 35 млн евро тўлайди. Куртуа эса “Реал” билан камида 4 йиллик шартнома имзолайди.

Маълумот учун, Куртуа якунланган мавсум Англия премьер-лигасида жами 35та ўйинда майдонга тушиб, шуларнинг 15тасида ўз дарвозаси дахлсизлигини сақлаб қола олган.

Эслатиб ўтамиз, Куртуа куни кеча якунига етган ЖЧ-2018да “Олтин қўлқоп” совринига ҳам лойиқ кўрилган эди.