Роналду "Реал"даги жамоадошига "Ювентус"га ўтишни таклиф қилди

"Ювентус" форварди Криштиану Роналду "Реал" Мадриддаги собиқ жамоадоши Хамес Родригесни Туринда кўрмоқчи. Бу ҳақда Marca нашри хабар бермоқда.

Юқоридаги манбаага кўра португалиялик юлдуз колумбиялик футболчига қўнғироқ қилиб, у билан “Ювентус”га ўтиш масаласини муҳокама қилган. Бироқ, Хамес ушбу таклифга қандай муносабат билдиргани маълум эмас.

Эслатиб ўтамиз, 27 ёшли Хамес сўнгги икки мавсумдан буён ижара асосида “Бавария”да тўп суриб келмоқда. Мюнхенликларда унинг трансферини 42 млн еврога сотиб олиш ҳуқуқи мавжуд. Аммо, улар буни исташмаяпти ва мавсум якунлангач уни яна “Реал”га қайтариб юборишмоқчи.

Маълумот учун, Хамес Родригес жорий мавсум “Бавария” сафида жами 14та ўйинда иштирок этди ва 3та гол ҳамда 2та голли узатмага муаллифлик қилишга эришди.