Роналду пенальтидан гол ура олмаслик бўйича Мессига етиб олди

“Ювентус” клуби ҳужумчиси Криштиану Роналду “Кьево”га қарши кечган Италия “А” серияси 20-тур баҳсида пенальтини аниқ амалга ошира олмаган эди.

Туринликлар бу ўйинда рақиб жамоани 3:0 ҳисобида мағлуб этди, аммо 52-дақиқида Роналду гол уриш имкониятидан фойдалана олмади. Дарвозабон Стефано Соррентино  бу вазиятда қаҳрамонлик кўрсатди.

Бу пенальти Роналдунинг Турин клубида аниқ амалга ошира олмаган илк пенальтиси бўлди.

Шундай қилиб, португалиялик футболчи жами 139 пенальтидан 25 тасида хатога йўл қўйган. Худди шундай натижа унинг азалий рақиби “Барселона” ҳужумчиси Лионель Мессида ҳам бор, аммо аргентиналик футболчи 108 зарбани голга айлантирган.