Россия терма жамоасининг яна бир аъзоси фаолиятини якунлади

Москванинг ЦСКА клуби ҳамда Россия терма жамоаси ҳимоячиси Сергей Игнашевич кеча Хорватияга қарши бўлиб ўтган учрашувдан сўнг ўзининг футболчилик фаолиятини якунлагани ҳақида эълон қилди.

“Бу менинг фаолиятимдаги сўнгги мусобақа ва сўнгги ўйин бўлди. Агар жаҳон чемпионати бўлмаганида, менимча фаолиятимни эртароқ якунлардим. Энди менда қувонч ҳисси ва хотиржамлик бор. Чунки фаолиятимни юқори нотада, жаҳон чемпионатида, ажойиб жамоа сафида ва ҳақиқий мураббий қўл остида якунлаяпман”, - дейди Игнашевич.

Маълумот учун, Игнашевич фаолияти давомида "Спартак-Орехово" (1999), "Крылья Советов" (1999-2000), "Локомотив" (2001-2003) ва ЦСКА (2004-2018) клубларида тўп сурган. У Россия терма жамоаси таркибида 127та ўйинда майдонга тушган ва ўз ҳисобига 8та гол ёздириб қўйишга эришган.

Эслатиб ўтамиз, бундан аввалроқ Александр Самедов ҳам терма жамоадан кетгани ҳақида эълон қилган эди.