SPORTS.uz: Умид Аҳмаджонов эртага Андижонга ташриф буюради

Ниҳоят, “Андижон” клуби маълум танаффусдан сўнг кучлилар сафига қайтишга жуда яқин турибди. Аниқроғи, яна битта ўйинда ғалаба қозонса, “Андижон” Суперлиганинг янги аъзосига айланади. Бунинг учун андижонликлар 13 ноябрь куни ўз майдонида Фарғонанинг “Истиқлол” жамоасини мағлубиятга учратиши зарур бўлади. Шунинг учун сешанба куни бўладиган учрашув “Бургутлар” учун жуда муҳим аҳамият касб этади.

Айни пайтда “Соғлом авлод” стадионида бўлиб ўтадиган ўта муҳим беллашувга ҳар томонлама жиддий тайёргарлик кўрилмоқда. Эътиборли томони шундаки, мазкур беллашув футболимиз раҳбариятини ҳам бефарқ қолдирмаяпти. Шу сабабдан Ўзбекистон миллий олимпия қўмитаси раиси, Ўзбекистон футбол ассоциациясининг биринчи вице-президенти Умид Аҳмаджоновнинг “Андижон” – “Истиқлол” ўртасидаги беллашувга ташриф буюриши кутилмоқда. Бу борада ўзи билан гаплашганимизда чиндан ҳам Андижонга ташриф буюриши режада борлигини тасдиқлади. Агарда режада бирор-бир ўзгариш юз бермаса, Аҳмаджонов ўйинни бевосита “Соғлом авлод” стадионида кузатади. Шунингдек, Тошкентдан яна бошқа бир қатор таниқли шахсларнинг ҳам ташрифи кутилмоқда. Чунки мазкур тўқнашувда келаси йили Суперлиганинг янги аъзоси расман аниқ бўлиши мумкин. Бунинг учун эса “Андижон”нинг “Истиқлол”ни мағлуб этиши талаб этилади. Ёдингизда бўлса, Умид Муҳаммаджонович шу йилнинг қиш фаслида Андижонга қилган ташрифи чоғида “Андижон” жамоасининг ўрни Суперлигада бўлиши кераклигини ва шу боис клуб ўз олдига фақат юқори мақсадларни қўйиши зарурлиги ҳақида ўз фикрларини билдирганди. Умид Аҳмаджоновнинг ушбу сўзлари ўлароқ “Андижон” клуби про-лигада чиндан ҳам Суперлига учун асосий даъвогарлардан бирига айланди ва айни пайтда деярли бу вазифани уддалашга жуда яқин турибди. Қолаверса, вилоят ҳокими Шуҳратбек Қўшоқбоевич Абдураҳмоновнинг жамоага қаратаётган эътибори, футболчилар учун яратиб бераётган шароитлари, кенг имкониятлар сабабли ҳам “Андижон” ўз мухлисларини хурсанд этиб келмоқда.

Яна бир эътиборга молик томони шундаки, боя таъкидлаганимиздек, майдон эгалари ушбу учрашувга ҳар томонлама юқори даражада тайёргарлик кўрмоқда. Шу жумладан мухлислар ҳам севимли жамоасини ҳар қачонгидан кўра катта иштиёқ билан қўллаб-қувватлаш учун ҳозирик кўрмоқдалар. Бундан ташқари, вилоят ҳокимининг ташаббуси билан жамоа аъзоларини муносиб равишда рағбатлантириш ҳам кўзда тутилган. Учрашувдан олдин эса мухлисларга байрам кайфиятини улашиш мақсадида концерт дастури ҳам уюштирилади. Хуллас, мухлисларни ажойиб совғалар ва сюрпризлар кутиб турибди.

Демак, 13 ноябрь, соат 14:30 да бошланадиган “Андижон” – “Истиқлол” учрашувига барча мухлисларни чорлаб қоламиз.

Шуҳратбек ЖЎРАЕВ