Месси ва Роналду, ана энди иккаланг ҳам Ҳусановга тан беринглар!
Ўзбекистон миллий терма жамоаси ҳимоячиси Абдуқодир Ҳусанов 2026 йилги жаҳон чемпионатининг энг тезкор футболчилари орасига кирди.
Футбол оламининг энг нуфузли мусобақаси ҳисобланган мундиал бош ташкилотчиси ФИФА ўз расмий сайти орқали Шимолий Американинг уч мамлакати - АҚШ, Канада ва Мексика мезбонлик қилган бу галги турнирнинг статистик таҳлиллари натижаларини эълон қилди.
Унга кўра, 22 ёшли Абдуқодир Ҳусанов жаҳон чемпионати доирасидаги учрашувлардан бирида соатига 36,46 километр тезликда югургани қайд этилган. Айнан шу кўрсаткич натижасида Ҳусанов мусобақанинг энг тез футболчилари умумий рейтингида олтинчи ўринни эгаллади. Шунингдек, Абдуқодир марказий ҳимоячилар орасида энг тез югурган уч футболчидан бири сифатида ҳам эътироф этилди.
Умумий рўйхатда биринчи поғонага Франция терма жамоаси ҳужумчиси Килиан Мбаппе жойлашди. У қайд этган максимал тезлик — соатига 37,61 километрни ташкил қилди. Кучли учликка, шунингдек, швециялик ҳужумчи Энтони Эланга (37,16 км/соат) ва Нидерландия миллий терма жамоаси ҳимоячиси Микки ван де Вен (36,77 км/соат) ҳам кирди.
Тезлик бўйича Абдуқодир Ҳусанов гуруҳ бақсида ўзи билан тўқнашган Криштиану Роналду ва финалда ўйнаган Лионель Месси каби юлдузларни анча ортда қолдирди. Португалия ва Аргентина терма жамоалари етакчилари ҳатто жаҳон чемпионатидаги энг тезкор 500 нафар футболчи қаторидан ҳам ўрин ололмади.
Қизиғи шундаки, рейтингнинг биринчи ўнталигида 2026 йилги жаҳон чемпионати финалига чиққан Испания ва Аргентина терма жамоаларидан бирор футболчи йўқ.
Турнир давомида Ҳусанов майдонда жами 27 912 метр масофани босиб ўтди ва 93 марта спринт амалга оширди.
Ўзбекистон терма жамоаси эса ўзининг дебют жаҳон чемпионатини гуруҳ босқичида якунлаган бўлса-да, Абдуқодир Ҳусановнинг ўйини миллий жамоанинг энг ёрқин воқеаларидан бирига айланди. У турнирдаги барча учрашувларда майдонга тушиб, барқарор ва етук ўйин намойиш этди.
Ҳусановнинг кўрсаткичлари ўзбек футболи учун тарихий натижа ҳисобланади. Илк бор ўзбекистонлик футболчи жаҳон чемпионатининг асосий статистик кўрсаткичлари бўйича етакчилар сафидан ўрин олди.
Ҳусанов тезлик, ишончли ҳимоя ва ҳужумларни бошлаш маҳоратини уйғунлаштирган ҳолда дунёнинг энг кучли ҳимоячилари билан тенг рақобатлаша олишини исботлади.
Фикрлар