Саррининг йўл қўйган уч асосий хатоси!

“Кўклар” 2019-йил бошидан бери тўққизта ўйинининг тўрттасида мағлуб бўлди. Ҳаммасиданам якшанба куни “Манчестер Сити”дан учралган 6-0 ҳисобидаги қақшатгич мағлубият ўтиб тушди.

Бу “Челси”нинг Премьер Лига тарихида 1991-йилда “Ноттингем Форест”дан 7-0 ҳисобидаги мағлубиятидан кейинги йирик мағлубияти бўлди.

Бундай антирекордлардан Сарри ҳам тез орада Роман Абрамовичнинг навбатдаги қурбонига айланиши мумкинлигини таҳмин қилиш мумкин.

Аммо танганинг икки томони бўлади. Клубнинг нурсиз ўйин кўрсатишида Сарри айбнинг бир қисмини шогирдлари гарданига бемалол юклаб қўйиши мумкин.

Аммо Премьер Лиганинг олтинчи поғонасидан жой олган “Челси” мураббийининг йўл қўйган муҳим хатоларини тилга олмасдан илож йўқ. Хўш, бу қайси хатолар? Қуйида ана шу ҳақида муҳокама қиламиз.

1. Б режанинг йўқлиги

Сарри жамоа бошқарувини эндигина қўлга олганида мухлислар унинг ёрқин футбол услуби “Стэмфорд Бридж”да чақнаши мумкинлигини кутишганди.

“Саррисмо” “Наполи”ни нафақт А Серияда, балки Европада энг жозибадор клубга айлантирди. “Челси” ҳам ҳудди шу нарса такрорланишини истаганди.

Саррининг янги жамоаси унинг услубига мослашиши учун вақт талаб қилиниши барчага маълум эди. Аммо илк умид учқунлари “кўклар” буни қисқа фурсатда бажара олишини билдирди. Аммо ўшандан кейин баъзи сабаблар туфайли бу иш бермади.

Биринчидан, рақиб жамоалар “Саррисмо”ни тўхтатиш учун италиялик мураббийнинг калит футболчиси Жоржиньони “ўйиндан чиқариб ташлаш” йўлини топишди.

Бошқа бир томондан, “кўклар” рақиб ярим ҳимоясини ёриб ўтиш йўлларини қидириш ўрнига ҳужумчиларига тўпни тезроқ етказиб бериш билан машғул бўлди. Энг яхши мураббийлар бундай ҳолатда ўз ўйин услубларини сайқаллаштиришда ва баъзи вазиятларда эса Б режалар тузишга ҳаракат қилишади. Сарри эса бу ҳақида ўйлаб кўргани ҳам йўқ.

“Челси”нинг “Борнмут”дан 4-0 ҳисобида учралган мағлубиятидан кейин Сарри журналистларга “Нега? Мен А режа яхшироқ ишлашини истайман” дея жавоб қайтарди.

“10 йил аввал “Барселона” барчасини ютганини ҳамма билади. Чунки улар ўз футболини жуда яхши намойиш қилишганди. Мен ҳам аввало ўз футболимни яхшироқ ишлашини истайман” – деди италиялик мураббий.

А режанинг иш бермаслиги ва Б режанинг йўқлиги туфайли клуб сафардаги уч ўйинда 12-0 ҳисобида мағлуб бўлди. Лондонликлар 2018-йил охиридаги сўнгги ўйинидан бери сафарда гол ура олмай келмоқда.

2. Ротациянинг йўқлиги

Кўплаб футбол мураббийлари ўзларининг севимли асосий таркибига эга. Бу уларнинг ўйин услубларига мос тушиши туфайли тушунса бўлади.

Аммо улар ротация қилиш асосий таркибни доимо жанговар ҳолатда ушлаб туриш учун керакли эканлигини ҳам тушунишлари бор гап.

Бу мавсум Европа Лигасида иштирок этаётган “Челси”дан кўпчилик ушбу мусобақада жамоа асосан ёшлар билан иштирок этиб етакчиларга дам берилишини кутишганди. Аммо Сарри ҳамма билган ҳақиқатни кўра олмади. Мураббий ўзининг энг кучли таркиби билан Европа Лигасида иштирок этди. Кейинги босқичга чиқиш йўлланмаси нақд бўлгачгина Хадсон-Одои ва Ампаду каби ёшларга имкон берилди, холос.

Карабао Кубоги ҳам ёрдам бермади. Барча мусобақаларни қўшиб ҳисоблаганда 40 ўйинда Сарри атиги 27 футболчидан фойдаланган холос. Шулардан 15 таси эса 40 ўйиннинг ярмидагина иштирок эта олган.

Бу 90 дақиқа қаттиқ меҳнат талаб қиладиган “Саррисмо” услубида футболчиларни анча толиқтириб қўяди.

Олдинги чизиқдаги учлик анча юқори ва қаттиқ прессинг қилишлари шартлиги туфайли дам олиш муҳим аҳамиятга эга. Айниқса 30 ёшни қаршилаган Виллианга ўхшаганлар учун. Бунга ечим сифатида ёзда “Бавария”га ўтиши кутилаётган Хадсон-Одоига кўпроқ ўйин амалиёти беришни айтиб ўтиш мумкин.

3. Азарнинг “алдамчи тўққизлик вазифаси”

“Челси” каби Азар ҳам мавсумни юқори нотада бошлашга эришди. Сентябрь ойида олти гол ва икки голли узатмани амалга оширган етакчи футболчи Саррининг 40 гол урадиган футболчиси бўлиши мумкинлигини ўртага қўйди.

Аммо бельгиялик футболчи ўша олти голидан кейин узоқ вақт рақиб дарвозасини аниқ нишонга ололмади. Нафақат у балки маркзий ҳужумчилар ҳам “Саррисмо”га мослашиш билан вақт ўтказишди.

Натижада Эден Азарга “алдамчи тўққизлик” вазфаси ишониб топширилди. Тўп билан бўлганда кўп ишларга қодир бўлган футболчи, алдамчи тўққизлик позициясида томошабинга айланиб қолди.

Футболчи янги позициясида жисмонан бақувват марказий ҳимоячиларни енгиб ўта олмаслиги кундек равшан эди.

Аммо энг катта муаммо шундаки Азар “алдамчи тўққизлик”дан кўра чап қанот вингери сифатида катта фойдаси тегади. Премьер Лигада бу позицияда унданда кучлироқ футболчилар деярли йўқ. Сарри чап қанотни Виллиан ва Педроларга ишониб топширишни маъқул кўрди. аммо улар бельгиялик футболчининг ишини тўлиқ бажара олмайди.

Хуллас, бош мураббийнинг йўл қўйган баъзи хатолари сабаб “Челси” айни вақтдаги ҳолатига тушиб қолди. Янги ечимлар тез орада таклиф қилинмаса, раҳбариятнинг унга бўлган ишончи ҳам йўқолиши табиий ҳолат.